路透社早前引述消息指中聯辦主任王志民可能會被叮走，雖然中央否認，但前日報道話港區全國人大代表葉國謙老竇葉旋威早前辭世，上星期五舉殯王志民都冇送花圈，再惹王志民被燉冬菇疑雲。噚日網媒香港01喺金鐘萬麗酒店舉辦經濟高峯論壇，話王志民會到場，八方同大班記者諗住去問王志民，結果佢繼續唔見人。
香港01請記者15℃食西北風
王志民噚日朝早同特首林鄭月娥獲邀出席論壇並致辭，大批傳媒一早喺酒店大堂等，不過公關話係私人閉門活動，唔設傳媒採訪，要記者全部出酒店外等，認真惡晒，當時得15℃，01作為傳媒機構要同行食風，有攝記不禁慨嘆：「睇吓呢啲傳媒點樣對行家！」
不過對777，態度完全唔同，創辦人于品海就到門外親迎林鄭。據聞王志民冇出席，改由3月任命做中聯辦副主任嘅人民網董事長盧新寧到場，而盧新寧走嘅時候，有記者問佢王志民為乜缺席、王志民係咪會調走、中聯辦係咪要就區選結果問責時，佢一句都冇答。
雖然噚日有親北京傳媒為王志民冇送花圈一事消毒，但佢噚日又no show，難免令人覺得唔簡單。但有政圈好事之徒話，按北京慣例，傳媒越講邊個官調走，通常北京硬係唔調佢走住，恐怕王志民可以坐多一陣西環個位。
李八方