【黑鏡線索】
區選結果有幾層意義。第一，係變相公投。民調又話唔信，睇唔到，好喇，而家終於清清楚楚，確立咗主流民意，乜Q所謂「沉默大多數」，藍絲唔敢再提，黃絲唔使再信。
呢層意義，完全同區唔區議會冇關，只係咁啱，撞正呢個時候，有個有公信力嘅一人一票機制，可以借嚟hack咗做公投。即係話，道理上叱咤總選投票都可以借嚟咁用，有同樣咁大嘅認受性嘅話。
唔係真公投，冇約束力，重要咩？重要，因為兩邊陣營，都有唔少勝利球迷。抗爭民意贏咗，第一鞏固抗爭邊勝利球迷嘅支持，第二削減對方勝利球迷嘅意志，第三甚至令一啲勝利球迷轉軚。
削傀儡收入 點計都有so
再加上，報道話，原來係因為變相公投嘅結果太一面倒，令侵侵比預期提早簽香港法。而公投結果加埋美國香港法，一齊發功影響勝利球迷，隨時投票日嘅六四比，到咗而家，已經推向七三。
變相公投之外，另一層嘅意義，增加持續抗爭嘅彈藥，就關區議會事。冇錯，區議會冇乜實權，但政黨都係盤數，要收支平衡。大家交嘅稅係潑出去嘅水，區選大勝，每一席都係錢，傀儡派收入大削，民主派資源大增。如果啲錢善用，例如聘請義士，一來一回，係六分波。退一萬步，就算亂用，都至少削咁傀儡派三分。無論如何都有so。
以上兩點，一個喺士氣上，一個喺資源上，幫到長期抗爭嘅耐力，對抗爭有直接好處。
雖然話區議會實權唔多，但都有啲位可能幫到抗爭，例如畀吓壓力交CCTV，查下區內二噁英放題嘅影響，搞吓警暴放映會，搞連儂文宣牆館等等，大家今次抗爭發揮嘅創意，喺區議會掩護下，可望搵到更多發揮空間。至於新區議員，能唔能夠喺一屆之內帶嚟新氣象，改善社區生態，屬於bonus，唔需要苛求。
橫掃區選 美國即傳來號角聲
體制之外，固然有民間外交，同街頭勇武、三罷。體制入面，區議會自己實權唔及立法會同特首，但係可以影響呢兩個選舉。喺未有雙普選嘅前提下，喺功能組別同小圈子嘅緊箍咒入面，當然反映唔到民意，但仍然爭取最大嘅對抗力量，寸土必爭。一嚟，特首選舉，區議會民主派會多咗一百一十七張飛。二嚟，勝利球迷效應，有望令立法會同特首選舉，打破以前嘅天花板。
有人話，抗爭唔應該有體制入面嘅一條戰線，既然唔滿意政權，就應該杯葛選舉，莫講話杯葛立法會同特首選舉，連真普選嘅區議會都唔投。呢個哲學問題唔喺度討論，但肯定嘅係，政權對手最希望見大家唔投票，而對手最想你做嘅，你做相反，應該唔會錯得太離譜。你睇區選結果辣到政權咁㷫，就知做啱咗嘢。經過六個月嘅抗爭，好多人嘅犧牲，就算政權用警暴打壓，香港人仍然團結爭取真正高度自治，區選勝利，美國正式向自由世界盟友吹來號角聲，呢一集大概嚟到結局。香港人比開局多咗區議會同香港法兩件兵器，抗爭可以捱耐啲。回一回氣，下一集嘅內容，照政權一貫睬你有味作風，大概如689預告，係The Empire Strikes Back。
撰文：宋漢生
fb : sunghsblog