【本報訊】零售、飲食、旅遊，坐在同一條沉船，香港旅遊業議會主席黃進達指出，隨着入境旅遊團下跌九成，整體入境旅遊人數下跌逾四成，為行業帶來極大衝擊。他坦言，不少導遊多屬自僱或散工的工作形式，行業轉差，「啲導遊好耐冇工開，惟有去餐飲等相似嘅服務性行業，諗住兼職賺錢，可惜呢啲行業也一樣無咩需求。」
飲食業料減薪一成
黃進達預期，旅行社在農曆過年後至少裁員一成，加上正在考慮裁員的公司，人數達兩至三成，「減薪都已經不足以抵擋呢個浪潮（行內情況逐步變差）。」而新春後轉為淡季，有公司結業也不足為奇。
立法會飲食界議員張宇人則表示，飲食業前景惡劣，早前估計有幾百間食肆結業是高估了市況，「肯定有過千，爭在係幾多千。」普遍食肆由12月至第二年2月的收入，會佔全年收入的四至五成，但今年的團年飯、擺酒、晚市的預訂情況不樂觀，預期較上年下跌四至五成。據張宇人了解，明年飲食界從業員減薪5至10%之間，加上樓面員工每月的小費與加一服務費的收入也相對減少，預計明年業內員工將十分難捱。