光復咗區議會，最想消滅嘅當然係前朝劣政，好多候任議員討論緊點樣煞停億億聲嘅小白象工程，觀塘音樂噴泉成為討論焦點。區內資深議員潘任惠珍議員提醒，政府已經同承建商簽約，毀約隨時要賠錢。佢拋磚引玉，提出噴泉都可以be water，播《願榮光歸香港》，仲可以豎立大白象工程恥辱碑，警惕世人踢走大白象工程。
建議瘋狂播《榮光》
做咗35年區議員嘅潘任惠珍一啲都冇脫節，幫大家fact check，原來噴泉撥款上年11月喺立法會財委會通過咗，仲已經簽約開始工程，如果𠵱家改做其他工程，可能要過一連串程序，分分鐘四年任期都未搞掂。佢提出Plan B，就係縮細規模，加入抗爭元素，固定播《榮光》同其他抗爭歌，到時可能日日聽到小鳳姐。
潘太仲建議豎立一幅永久連儂牆，好似海德公園咁有個角落畀市民發表意見。但八方最鍾意都係建立石碑嘅建議，可以記錄億元噴泉嘅前世今生，用嚟警惕後世。如果成事，有潛質成為新景點，仲可以將抗爭精神永留存。