今年37歲嘅蔡卓妍（阿Sa）最近傳出計劃喺今年底同百億麻將館太子爺石恆聰註冊結婚，又指佢已經懷孕。《蘋果》讀者黃小姐透過「爆相爆片」分享，日前喺日本羽田機場發現阿Sa蹤影，黃小姐表示：「嗰日下晝4點幾，一過關入咗機場禁區，就見到阿Sa一個人左望右望，當時佢冇戴口罩，只係戴咗頂帽，着黃色外套，見佢個樣都幾開心，好快就行咗入Chanel睇手袋。」
「同朋友去」
黃小姐指全程只見到阿Sa一個人，當時佢坐國泰航班嘅商務客位，由於座位位置近通道，可能擔心被人認出，阿Sa就戴上口罩。問到覺唔覺得阿Sa懷孕？黃小姐話：「我睇唔到，因為佢係坐低，件褸放喺前面，不停低頭玩手機。」從相片所見，阿Sa嘅手臂位好有肉，將枕頭放喺腰背，仲將黃色外套放喺大腿上，完全遮晒個肚。
阿Sa經理人霍汶希以短訊回覆：「佢係同朋友去嘅，因為佢要早啲返嚟做嘢。」至於盛傳阿Sa大肚，霍汶希日前已經代阿Sa否認，仲話網上傳聞只屬虛構，又話阿Sa最近下巴位置腫起，已聽醫生吩咐照磁力共振，知道係免疫力系統出現問題。
