港足過去曾兩度出戰東錦賽，兩次均有入選的只有四人，包括文彼得、陳偉豪、吳偉超和「細焯」潘耀焯。現為南華主教練的細焯指，跟日本、南韓及中國交手機會難得，但最難忘是港足前主教練金判坤在比賽中發生的一段往事。
03年後出線難度增
細焯曾兩度隨港足出戰東錦賽，兩次賽事均在日本進行，他對這項賽事印象最深的，除了強大的對手外，還有天氣，他說：「感受好深，因為難得攞到參賽機會。面對中國、日本同南韓呢啲當年或家陣都係亞洲頂尖嘅對手，兩次都係喺寒冷嘅天氣進行，所以要應付天氣同強勁對手，都比較吃力，但係過程學到好多嘢。」
憶起兩度奪得決賽周入場券，細焯表示，03年那次得來相當容易：「第一屆未有北韓，所以香港順理成章，好容易贏蒙古、贏關島、贏澳門，攞到入場券。」不過，港足之後要再闖決賽周變得相當困難，「之後曾加過澳洲，又加番北韓。呢個係香港好渴望去到嘅賽事，可以喺短時間對到三支亞洲好強嘅對手，而對手亦係好認真應付呢個比賽。」當時東亞三強對東錦賽重視，派遣大部份主力出戰。直至10年，香港終於第二次出戰東錦賽決賽周，但港足只是守和北韓，再以得失球差壓倒對手晉級，細焯憶起當時外圍賽次圈的賽事，「10年對北韓打和，最後一場對關島，我哋贏左12球，連我都上去頂入咗球，嗰屆係得失球壓過北韓晉級。」
阿Kim發火打黑板傷手
當屆港足以八個得失球差壓過北韓晉級。細焯指當年主教練金判坤對北韓有針對部署：「北韓特質都係打不死，拼搏全面。當年佢哋技術唔太好，係靠機動制勝。教練針對呢樣去密集防守，令對手冇咁多空位進攻，然後我哋喺其他對手身上攞到好多入球出線。」
最後計劃順利，港足在決賽周挑戰更強對手，首戰就是面對金判坤祖國南韓，「嗰場最難忘，我記得我做隊長，嗰場打得唔好，上半場唔知落後幾多球，入到更衣室大家都唔開心，又凍喎。」不過，比賽過程並非重點，令細焯難忘的是半場休息時在更衣室發生的一件事，「入到去得一個人成身好熱，就係金判坤，我哋上半場打得唔好，可能面子上有啲唔開心啦，佢一嘢打落黑板。」當時港足半場以0:4落後，金判坤一打令手部受傷，更衣室內的球員和職員都嚇呆了，但也令球員醒覺，下半場戰至補時才再多失一球，最後以0:5落敗。
另一場令細焯印象深刻的東錦賽，是03年那一屆，對手也是南韓，皆因該仗港足憑「大俠」羅倫士攻入一球，至今仍教球迷津津樂道，細焯說：「對手有李雲在，仲有嗰屆最有價值球員柳相鐵。嗰場波，羅倫士接應一個長傳，巧妙地用膊頭壓過兩個南韓守衞，再喺李雲在出迎之際過埋佢射入。」這入球成為經典，除了因為對手是南韓，也因為建功者是羅倫士，「我哋嗰陣覺得喺佢身上冇可能發生嘅事，偏偏就發生咗。」羅倫士這個技驚四座的入球，也令他得到外國球會的注意，細焯續說：「可能因為呢球波，當時佢引起好大迴響，好多人搵佢落班。」筆者說：「你哋當年係球會隊友喎！」細焯答：「係呀，我哋一齊踢愉園，之後佢都一直踢愉園，最終冇其他球會簽佢。」或許羅倫士就是欠缺「自動導航」，所以未能成功外流。不過，當年的東錦賽的確令香港球員有機會受到外國球會注意，細焯指：「呢啲比賽有啲球探去睇，始終都係高水平，好多球探睇吓有咩亞洲球員啱用。」
畢竟踢過兩屆東錦賽，細焯對三支東亞強隊都有較多對陣經驗，他認為三隊各有不同風格：「兩次對日本，對手都係用波能力較強，以地面進攻為主。南韓就較機動，球員有跑唔完嘅氣力，多用兩邊翼鋒。對中國就多高波，我哋制空力當時唔太強，當年冇咁多入籍球員，03年得羅倫士、10年就有卓卓。當時踢東錦賽，對本地球員嚟講係好好嘅經驗同體驗。」
寄語後輩好好裝備
細焯寄語現役港腳要好好準備東錦賽之旅，「做球員嘅，就要好好裝備去踢呢個比賽。」要拼盡，因球員在場上代表的不只是自己，穿上港足球衣，就代表了香港足球：「我諗東錦賽都好多轉播或直播，可以畀人睇到現時足球現況，亦都可以睇到港隊嘅風格。我相信球員都好享受踢呢啲高水平比賽，或者對出名嘅球員，佢哋都會盡能力為香港打好每場比賽。」本月中在南韓釜山，且看港足能否再創傳奇一刻。