喺觀塘月華區勝選嘅「連登女神」梁凱晴自參選以嚟人氣極高，甚至紅到去日本，仲俾日本網民封佢做「港版綾瀨遙」，佢噚日俾記者問對呢個稱呼有乜感受，佢笑住話高攀唔起。不過佢好受「歡迎」就肯定，除咗俾一班藍絲大媽「狙擊」外，《城巿論壇》主持蘇敬恆亦出手幫佢「上位」。
幫口K.O.藍絲大媽
梁凱晴噚日以候任區議員身份，現身港台節目《城巿論壇》後，佢喺現場成為紅衣藍絲大媽嘅狙擊對象，一度喺梁凱晴準備時對佢大嗌：「屋企爛晒啊！屋企啊！」又話不滿有人示威時堵路同埋整連儂牆。台上嘅主持蘇B見狀，就勸該名大媽冷靜，並一句K.O.佢：「紅色衫呢位女士，你可以下次用投票去懲罰佢都得嘅！」梁凱晴就好禮貌咁話多謝巿民嘅意見。梁凱晴之後接受傳媒訪問，由於身形嬌小，俾咪牌遮住咗半邊面，蘇B見狀就主動化身搬運工人，抬嚟一個木台幫梁凱晴「上位」。
早前日本網民封梁凱晴做港版綾瀨遙記者問佢有乜感受時，佢就有啲尷尬咁笑住話：「我高攀唔起呢個稱呼啦！因為始終自己係一個好普通嘅女仔。」話可能因為香港從政嘅女性比較少，所以一有女性從政，就會畀人一種耳目一新感覺，惹來好大迴響，但都希望大家注重返佢哋區務嘅工作，「我覺得外表呢樣嘢係各花入各眼啦，我自己就覺得實在高攀唔起呢個稱呼」。
選舉落區拉票時，曾經遇襲嘅佢又話，希望嚟緊有時間學吓武術防身兼鍛煉體質，但佢似乎嚟緊都未必有時間嘞，皆因佢目前仍未辭工，力爭明年6月可以考到專業會計師資格，更好服務巿民。
李八方