商台將於下月1日舉行「叱咤樂壇流行榜頒獎典禮2019」，唔少網民都希望將包含咗香港人精神嘅《願榮光歸香港》成為本年度「我最喜愛的歌曲」。不過《願榮光》冇歌手演唱，而叱咤投票機制係以派台歌播放率定勝負，上個禮拜首歌終於排除萬難派台，仲登上商台「叱咤咤 派台歌」網頁，好多網民入去打氣，狂吸超過11萬個like。
靠DJ努力播歌
不過有網民誤會like夠10萬，就可以打入十大成為候選歌。商台對外事務部發言人回覆《蘋果》，澄清候選機制係上榜歌：「所有本年度上榜歌曲均自動入圍『叱咤樂壇我最喜愛的歌曲』候選名單。」
最後一期叱咤榜今個星期六揭曉，究竟《願榮光》可唔可以上榜，就要靠903 DJ努力播歌，而入到圍嘅歌曲將於下周一開始接受投票，由樂迷投出最後五強，下月1日當晚由現場觀眾一人一票投出我最喜愛的歌曲，即係話就算有幾多like都冇用，要靠903 DJ喺節目入面播歌，先有機會打上榜，自動成為候選歌。而前日公佈嘅「903專業推介」頭20位，《願榮光》仲未上到榜。
至於首次殺入「我喜愛的女歌手」五強嘅林二汶，前日喺Ig貼出走勢圖，笑自己係「最正面女歌手」，因為其他歌手都係影「三七面」。
二汶預先寫感言
同樣入圍五強嘅謝安琪就留言回覆：「實至名歸，最正面嘅歌手當之無愧。」二汶就話自己未必有機會喺台上講得獎感受，所以率先感謝大家一直以嚟嘅支持。
撰文：馮仁昭