自從小熊上台後，內地政府鍾意失驚無神，收緊呢樣，收緊嗰樣，呢頭話限薪，轉頭又話要限埋題材，呢樣唔得，嗰樣又唔得，搞到電影公司都唔敢貿貿然開戲，做幕後嗰班冇工開，嗌晒救命，明星嘅收入亦大受影響，以前風光時，億億聲咁袋落袋，咁𠵱家呢？當然唔使好似幕後咁叫苦連天，爛船都有三斤釘，不過大打折扣在所難免。
其中一位內地靚仔明星「甜品大哥」身家亦大縮水，近年真係頭頭碰着黑，事業家庭運認真麻麻，收入大減，投資又損手，但冇減土豪個性。好多識得「甜品大哥」嘅人都讚佢為人疏爽，重情重義，但更鍾意同人比較，不惜大灑金錢顯威風，好似有次家有喜事大派利是，佢封利是前竟然搵人四圍打探，想知道某某星辦同一類型喜事時派幾多錢利是，一定要派得比人豪，根本就係中國人愛面子嘅性格，身邊人曾經好言相勸，同佢講利是都係講意頭，代表一份心意，多幾百同少幾百其實分別唔大，但「甜品大哥」就好堅持，覺得錢可以掉，但面子絕不可丟。
撰文：Jessie
姐匙Talk
我姐匙縱橫歌影視幕後，多年嚟冷眼旁觀，娛樂圈大小事都走唔過我雙眼，歡迎大家嚟剝花生。