生小孩供書教學，除了付出金錢與愛心，更需要的是香港人最缺乏的時間。全職媽媽李玲（Natalie）沒有讀過美術課程，小時候勞作堂習作也不是特別高分，但自從開始為兒子樂樂自製玩具之後，能力覺醒，而且創意泉湧。訪問當日丈夫Jason也在家，趁Natalie被仔仔纏着時先問Jason：「覺得太太啲DIY玩具點？」「之前都唔知太太咁勁……」Natalie聽到回應：「連我自己都唔知呀！」
來到Natalie的家，有花園有草地，屋內陳設也很earth tone，製作玩具的材料也來自舊包裝及紙皮，以為他們一家是環保分子，Natalie說：「環保呢個原因佔30%啦。」其餘70%，則是為了和兒子更多交流，也為了製作更適合仔仔的玩具，「之前都有買玩具，不過佢好快玩厭。其實佢想玩嘅嘢可能就喺身邊，例如佢對有人煮嘢食好好奇，咁我就整個小廚房畀佢玩。」旁邊的Jason說：「其實過程都好開心，有幾可一家人可以坐埋一齊幾個鐘做同一樣嘢？就係開始自製玩具之後，我哋成日都坐埋一齊設計呀，之後又一齊落手整，變成一樣好健康好有趣嘅家庭活動。」
男仔玩具 要加機關
這時候正在拍攝的攝影師問：「爸爸你會唔會上鏡？」Jason答：「唔需要啦，今日太太係主角。」的確，Natalie在這個家庭活動中是主導，但男仔喜好不是爸爸最清楚嗎？Jason說：「唔係，太太好知道樂樂想玩乜。」兒子出生之後，有一段時間Jason工作特別忙，「嗰陣好似打兩份工咁。」Natalie和兒子獨處的時間最多，當然也要佩服Natalie的觀察力，「男仔玩具最重要有機關，否則好快玩厭。即係你見佢成日會㩒、扭啲掣，所以我盡量都會做多啲可以活動嘅部件，例如停車場個蓋可以彈開又可以閂埋，之後佢開始玩時就會㩒開個蓋嗌：『出擊！』臨瞓又會將啲車仔放入停車場話：『佢哋都瞓覺喇。』」
至於材料則以紙皮為主，還有不少是廢物利用，如沐浴露的泵蓋，「不過都有嘢要買返嚟，例如用嚟上色嘅塑膠彩，仲有LED燈。」係！Natalie勁到為小城市入面嘅消防車總部加燈加開關，點解會識？「有時會上網睇外國啲片學，再加心思改裝。」如城市場景，她足足花了約30小時才完成。Jason有幫手嗎？「可能有啲細節位或上色我會幫手，好似啲斑馬線，我哋漏夜用塗改液畫上去，畫到我吖。」
Natalie的作品中，有花了差不多60小時製作的小cafe屋仔，還有一部有安全帶及可打開尾箱的的士，「佢最鍾意扣安全帶，坐爸爸車時都係咁，所以我又整埋安全帶畀佢。」一切的開端，源於無心插柳，「第一次DIY嘅玩具，應該係用飲管加通粉畀佢串吓串吓玩一餐，之後就諗其實可以自製玩具。」自己的童年生活也有影響，「細個玩具唔多，成日喺屋企自己搵嘢玩。」冇錯！大家都應該試過用晾衫夾砌飛機吧！「而家諗返，好多畫面都好溫暖。尤其而家社會咁多唔開心事，諗返細個同家人一齊嘅畫面，都會好暖心。」所以Natalie也希望樂樂的回憶中有更多暖心場面，更多色彩。
聽到樂樂和朋友說：「呢個玩具我媽媽整嘅。」已經是一種回報，Natalie說樂樂玩得好斯文，「基本上都冇乜點玩爛，希望可以玩耐啲，啲玩具我都唔捨得丟。」心血嘛，下一步會創作甚麼？「下一步等佢大多少少，我希望佢同我一齊整玩具，我諗佢會覺得更加有趣。」
Natalie還有facebook專頁「親愛的 Be a better mom」及網站記錄DIY玩具的製作過程，「因為有啲朋友嚟到我屋企睇過後，有興趣想整，好多人會問點整，咁我不如一次過放上網，希望可以分享畀多啲父母睇到。」
抗拒港式規律教育 「對生活冇幫助」
在Natalie家中，地下大廳沒有梳化大電視，大片木地板都是自製的玩具，旁邊有玩具櫃、書櫃。上一層還有樂樂的玩樂及閱讀空間，在房中才看到梳化電視。刻意不想讓仔仔看太多電視？「好難嘅，都係限定佢一日睇一陣卡通片。」Jason說：「我哋本身都好少睇電視。」也應該，大大間屋又有花園，很多東西也好好玩。「我哋本來都係住大廈，但後來討論過，就係想將來畀樂樂home school，所以先搬咗嚟呢度，想有多啲空間可以同佢玩，而且又有戶外地方。」夫婦二人有共識，就是不太想兒子接受香港的規律式教育，「香港都有呢啲home school嘅群組，會約出嚟畀小朋友一齊多啲社交，又會討論吓點教學。都會搵啲教材返嚟，等佢大個啲睇佢有乜興趣鍾意啲乜，再會喺唔同方向教佢嘢。唔想佢學一啲對人生或生活完全冇幫助嘅嘢。」係啦！我都唔知我以前學微積分嚟做乜。
採訪：陳孝義
攝影：徐振國