小花今天也不小了，王馨平今年51歲。當年的「寶記小花」（寶麗金唱片）人多勢眾，如今嫁人的嫁人（周慧敏）、離婚的離婚（黎瑞恩）、未婚產子的也有（關淑怡、湯寶如）……難得是，大家仍在江湖。
王馨平說：「原來時間真係會過㗎喎！」當年唱《美少女戰士》的小花，歲月洗禮過後，真的育成了另一門的戰技，王馨平近年多了另一個身份，就是瑜伽老師，每星期要教八至十堂的瑜伽班，時間排得密麻麻。
副業不忘本業。王馨平最近就翻唱了《心有千千結》一曲，未來仍有灌錄新歌的打算；上星期最奔波，是為父親王羽獲台灣金馬獎「終身成就獎」而赴台代領。
多得練瑜伽有功，面對各種高難度體式，堅持最重要，「做唔到，但係我唔會放棄，我都會照練習，或者有一日做到呢，總之呢個過程你就係要做囉！即係我哋成日都話，just do it，你唔好諗喇！」瑜伽如人生。
撰文：文嘉龍
攝影：陳慧安
係一種幾舒服嘅痛楚
王馨平三年前考獲瑜伽老師執照，當初只因為打得高爾夫球多，身體出現勞損要找物理治療，治療師提議她練瑜伽，由高溫瑜伽開始，從此一試上癮。「學習瑜伽對我嘅人生改變梗係多啦，不止身體方面畀我嘅鍛煉，我覺得佢喺我嘅內心修練亦都好豐富。」
人體奧妙展，越痛越愛也是另一種體會，「每一次上瑜伽堂，我都痛苦㗎，尤其係我去上我老師嘅堂，我嘅老師完全知道點樣去炮製你㗎！嗰種痛楚你可以講係一種幾舒服嘅痛楚，我絕對係一個好硬筋骨嘅人，由細到大都係，當我初頭練瑜伽，好多時候同你筋骨柔唔柔軟有好大關係，真係要忍住痛苦日日去做，要努力唔可以放棄，呢個過程當中呢，你亦會好驚奇發現，原來人嘅身體，無論你去到幾多歲，只要你係肯去鍛煉，你係會進步㗎喎！係一件好神奇嘅事。」
另一神奇事情，就是連結婚18年的老公，最近也終於「的起心肝」肯跟她一起練習，「其實老公都鍾意運動，不過佢同大多數嘅人諗法好似，覺得瑜伽係比較屬於女人嘅嘢！我又唔想逼佢啦，因為你逼人係唔會有好結果㗎嘛！呢幾年佢有去做健身，瘦咗啦又結實咗，咁我作為老師，我就同佢分享，如果練吓瑜伽呢，你健身就會做得更加好，佢慢慢都算聽咗我講啦！」
王馨平2001年與金融才俊李家輝（Stephen Lee）結婚，她說兩人婚後鬧交次數不多於十次，「我哋兩個人嘅相處過程唔係話平靜，我哋兩個好搞笑㗎，我先生都係一個好搞笑嘅人，只不過我諗我哋結婚嗰時，我都32歲喇，有一定嘅人生經歷，我先生都係，所以我哋都係好成熟嘅人；同埋我先生性格好就得人，我哋嘅相處又真係冇話特別嗌交嘅情況出現，咁多年嚟我真係數唔夠十次囉，係有嘈嘅時候，嘈起上嚟都幾大鑊！」
有幾大鑊？「佢都會一輪嘴咁鬧我，我慢慢都會發展出一套對付嘅方式，我會即刻『鵪鶉』囉，唔出聲，等佢講完先，講完之後佢自己會同我say sorry，我亦都會俾人落台階，唔會話纏住不放要一路嘈落去嘅！」
我唔係大家以為嘅乖乖女
王馨平和老公因「相睇」而結識，由她嫲嫲和姑姐安排，王馨平先後已推了數次，最終應約才促成這段戀情，「人嘅緣份係好奇妙，我諗返如果我同我先生早幾年相見（睇）呢，我諗我哋亦都唔會最後有結婚囉，我覺得個時間點都好緊要。」
婚後試過人工受孕卻不成功，對於生育下一代，如今已不強求，「我自己真係覺得唔係一個好自然嘅過程，同埋係要受少少苦嘅，我老公方面覺得，你做乜要受呢啲苦呢，佢又唔想我受呢啲苦，所以我哋試咗，冇就算喇……我哋兩個又唔係嗰啲一定要有（小朋友）嘅人；另外我亦都好幸運，我嘅老爺奶奶佢哋都係非常開通，可以話係好西化㖭，從來冇畀我呢方面嘅壓力，所以冇話係一個煩惱，總之隨緣，冇就冇囉！」
2001年結婚前，也是王馨平人生的轉捩點，她結束了與鄭嘉穎的一段情；事業上也離開了出道的寶麗金唱片公司。1993年入行簽約寶麗金的她，憑《別問我是誰》爆紅，王馨平有「寶記小花」之稱，與周慧敏、黎瑞恩、湯寶如、劉小慧、陳慧嫻和關淑怡並列「七小花」。
去年周慧敏舉行出道30周年演唱會，在台上與王馨平和湯寶如合體唱出《美少女戰士》，集體回憶返晒嚟。王馨平與各小花的感情，反而越老越濃，「以前真係後生，我又比較靜啲嘅，我同其他幾個小花，聽講佢哋會成日打牌，咁我唔鍾意打牌嘅，嗰時真係同佢哋少接觸，淨係公事上見到，但係隔咗咁多年之後，你點樣計返，大家都叫做相識咗十幾年二十年吖，同事又好乜都好，都係識咗二十年，咁仲唔重要咩？係重要㗎喎，𠵱家大家見返個感覺係覺得可貴，係珍惜嘅！」
寶麗金的盛世年代，亦令王馨平回味，「我一年出兩至三隻碟，成日不停要入錄音室唱歌，嗰個生活係我鍾意嘅，喺錄音室對住個咪唱歌，我𠵱家諗返，係一個我好鍾意回味嘅過程；另外我覺得，原來時間真係會過㗎喎，大家台前幕後培養出嚟嘅感情好難得，我𠵱家身邊有好多幫我手，我唔敢話佢係助手，可以話係我經理人啦，都係我哋寶記嘅同事，有時出去做嘢，你見到其他嘅同事都係以前寶記嘅同事，嘩，覺得雖然話時間過咗，但係咁多年之後大家都仲可以一齊相見。」
還有與鄭嘉穎的一段常被人提起的戀情，當年王羽一直反對女兒與鄭來往。「都過咗咁多年嘅事，人哋𠵱家都有個好好嘅家庭，有個好好嘅太太又生咗個仔咁開心啦，所以有時覺得提返起呢，不值一提呀！但係我想講個重點，唔係講人，而係我對於自己嘅生活，我係有主見嘅，我絕對唔係大家以為所謂嘅乖乖女，所以到最後大家行唔到落去，係因為真係大家行唔到落去，而唔係之前有一啲人話，係聽爸爸話而唔一齊。」
好多年前見過甄小姐
說起爸爸，王馨平是王羽和林翠女兒，父母在她幼稚園高班的時候已離婚，王馨平一直跟隨父親生活至入行才回港定居。今年75歲的王羽，2015年傳出第二度中風，在泰國曼谷機場暈倒後緊急送台，至今仍留院。上周六獲台灣金馬獎的「終身成就獎」，由兩位女兒上台代領。
王馨平說：「（爸爸身體）真係唔係咁好，我又唔想講大話，但係又唔想講到好清楚到底係點樣狀況，因為始終都想保持佢喺好多影迷心目中大俠個形象，所以我唔可以話講得好清楚……到𠵱家都差唔多就嚟四年喇，我都係每個月都要飛過去，其實講真係我個妹（王加露）呀，住喺台北嗰個妹，佢係主要嘅照顧者，佢都好辛苦，咁我都要盡吓我嘅責任，我可以做嘅就係，每個月飛過去望一望，睇吓可以幫到啲乜嘢，同埋亦都係畀到我個妹，點樣講呢，係一個安慰囉，如果唔係我個妹就真係好辛苦喇！」
與父親的相處，王馨平坦言兩人不是一般可以傾到心事的父女。面對一直表現威嚴的父親，王馨平自有一套方法應對，「我覺得我嘅處理方式係唔想同佢起衝突呀，所以我會，以前嗰啲嘢呢，佢話，我就哦，好呀，但係你係咪真係咁樣做呢，佢唔知㗎嘛！我覺得做乜要起衝突啫，尤其我爹哋個脾氣咁大，你同佢去起衝突，大家都冇好處㗎，總之喺佢面前，哦，好呀，背後做唔做，我有決定㗎嘛，我自己都係一個成人。」
王馨平1993年挾住王羽之女和甄妮愛徒之名入行，可惜之後王羽與甄妮鬧翻，王馨平更與甄妮陷合約糾紛而鬧上法庭，「一個係我爹哋、一個係我經理人，佢哋嗌交係因為我，如果我真係識做，我可以𠱁一𠱁我個爹哋、𠱁一𠱁我嘅經理人，我喺中間其實可以做得好啲！𠵱家睇返，奈何我嗰時年紀又細，淨係聽爹哋講囉，咁聽爹哋就冇彎轉㗎喇，卒之搞到不歡而散！其實我好多年前見過甄小姐㗎，我哋食過一次飯。」
那餐飯是這樣的，「𠵱家講返係好多年前，其實我次次見親佢都係好尊敬佢，佢始終係帶我入行嘅人，而我覺得如果嗰時我識得去處理，我諗唔會搞到大家後尾咁糟糕嘅場面出現囉！（餐飯）係我約佢，佢都係一個好真性情嘅人。你知啦，甄小姐個人，佢say OK嘅，我哋約咗一次食飯，亦都食得好開心，不過𠵱家講返我都唔記得幾多年前喇，我諗都有十年喇！嗰時我結咗婚，我嗰時同甄小姐嗰個官司嘅日子，同我再見返佢嗰時，亦都隔咗好多年，所以你𠵱家問我，我記憶中就係我哋冇乜講返嗰啲嘢㗎喇，淨係食餐飯咁囉！我請嘅，我應該要請嘅，佢係長輩！」
多年心結算是解開了？「我諗算啩，其實有乜大仇啫，根本冇乜大仇，係咪？大家都係，佢又係，我爹哋又係，其實都係好真性情嘅人。」
【後記】林翠與陳山河
王馨平與林翠兩母女相處的時光不多，1993年王馨平入行，林翠由美國返港相伴，每逢周末王馨平就從太子道嫲嫲的家，到媽媽在界限街的家暫住。「計返個日子，我同我親生媽咪嘅相處真係唔夠，但係我同我親生媽咪嘅相處係好愉快㗎！我媽咪本身係一個非常開朗又冇架子嘅一個人，所以好懷念佢，因為佢走得太早喇（95年突發氣喘病，享年59歲）！」
而王馨平有一個比她更早出道的同母異父哥哥陳山河，「我同陳山河一路都冇聯絡，曾經有一段時間，我𠵱家講緊好早期，可能都係九幾年嘅事情，佢嗰時應該住喺台灣，佢都有搵過我同我兩個妹，臨尾佢就好似離開咗台灣去咗第二度，跟住佢都冇再搵過我喇！𠵱家其實我舅父（曾江）同佢有聯絡，我都有問過舅父，舅父都叫我唔使理，我就冇繼續過問！」
場地提供：銅鑼灣皇冠假日酒店