久不久潛進敵營實地觀察，不知道算不算間諜行為，但我可以告訴你，如果藍絲是一部即日公映的電影，肯定不帶占士邦的步步驚心，反而彌漫周星馳無厘頭風格，不興波作浪的時候，因疑惑和困擾衍生的喜劇感令人笑到變成滾地葫蘆。譬如某唯美藍講起曾經拍硬檔表演相聲的姊妹，「真係睇唔出啊，佢咁中意着名牌，周身香奈兒愛馬仕，原來黃得咁淒涼」，深深自責當初唔帶眼識人。哈哈哈，we are what we eat就聽得多箒，食乜屙乜天經地義，衣櫃的戰利品同政治取向掛鉤倒真聞所未聞，難道他以為廣東道店鋪遭大媽大叔壟斷，黃族便冇窿路買貴價時裝？憑衣着推測肚裏的顏色，究竟邏輯何來，唔通着親Kenzo必定姓錢名瑪莉，唔准人哋叫利專娜劉或者得利撒鄭？更可能，那是逢黃必窮的刻板成見，白鴿眼認定示威者晌社會no stake，餐餐捱冷冰冰的生命麵包，開飯都成問題，唔會有閒錢去太古廣場濕平──貫徹藍絲什麼都聚焦在金錢的思想模式。
另外，還聽到撐警俱樂部一位永久會員的牢騷：「嗰個邁克吖，又住過美國，又住過法國，照計梗見過鬼佬警察幾咁兇殘……，點解會咁不明事理，日日寫埋晒啲偏幫『暴徒』嘅嘢？」頓一頓忽然靈光閃現萬佛歸宗：「你慌唔係收咗肥佬黎好多錢咩！」嘩，係就好啊，我都想黎老闆（或普渡慈航的外國勢力）無上限入錢落我個銀行戶口，等我可以個個月飛去日本坐在花道旁迷戀海老蔵，散場仲去新宿二丁目叫兩隻銷魂鴨，返帝國酒店豪華套房通宵玩三王來朝，添噃。