上星期日去投票，人龍甚長，仔女叫左丁山唔好去住，等黃昏時間先至去都未遲。呢個係好意見，但又收到不少選民轉發短訊嚟，話藍絲群組廣傳投票三小時後就可能會有騷亂，叫人快啲去投票。呢啲事，資詢吓老婆意見，老婆話：「藍絲消息不可信：上次夠傳過甚麼暴徒會破壞電站，會令全香港停電啦，亂咁嚇人啫。」又係噃，破壞電站嘅假消息連餐廳R都聽到（佢唔識中文，係夥計話畀佢聽嘅），嚇到鼻哥窿冇肉，因為佢嘅餐廳已經生意慘淡，巨型雪櫃藏咗好多凍肉，一旦停電，損失慘重也。餐廳R猛咁追問左丁山「停電」會否成為事實之際，又收到一條藍絲傳來短訊：「屯門市中心已部份停電」，於是不敢怠慢，急急找到中電高層請佢澄清，佢輕描淡寫咁回覆：「本公司發電一切正常。」以此答番餐廳R，佢大罵亂作Fake News之人，因住天道見遠。
記番呢件事，即刻信晒老婆，黃昏再去票站，果然人龍已縮短到幾十人，有維持秩序之職員高叫：「身份證號碼A字頭、B字頭嘅行呢邊！」啱晒，與老婆直入票站，唔駛排隊，幾分鐘就搞掂投票。次日得知投票結果，邨內曾任區議員近十八年，做過業主委員會主席嘅老波骨竟然大敗畀一位初出茅廬小子，小子憑乜嘢取勝，哈，得兩個牌頭：（一）中文大學畢業，（二）民主動力，其實當區選民冇乜人知佢係邊個。
於此可見，今年區選就係睇政治，唔講民生、服務，一國兩制研究中心總裁張志剛評論呢場社會運動：「民氣可慮」，可謂一矢中的！可惜建制派軍師及文宣大概唔識字，唔知乜嘢叫做「民氣可慮」，好啦，選舉大敗嘞，還有死硬派藍絲唔服氣，光頭警長指有160萬張廢票，其知識震驚14億人民，將張建宗嚇得要死，政府要急忙澄清，「所有數字都是公開、透明的，請勿胡亂製造謠言，影響市民對選舉制度的信心。」光頭警長係此水平，也還算了，竟然還有藍絲成功人士廣推，左丁山睇到，真係我見猶憐，唔通真係「人一藍，腦就殘」？李怡專欄日前講過納粹空軍空襲英倫失利，前線德軍還是虛報軍情，欺騙希特拉及柏林指揮部，只講上司喜歡聽嘅說話，於是埋下戰敗伏筆。歷史係會在威權主義、一言堂政權重演嘅。Foreign Policy資深編輯James Palmer撰文（見眾新聞網站報導）指內地官媒英文版在上星期六已寫好香港區選建制派大勝嘅稿件，點知香港選民真真正正Throw the rascals out，令官媒抽稿抽得好狼狽，點解官媒記者會咁笨？咪就係納粹空軍翻版囉，中央駐港官僚不相信「民氣可慮」，主觀地以為民意逆轉也。