鄭錦昌入行多年，與徐小鳳、薛家燕、呂珊等歌手識於微時，早年更曾與小鳳姐一同在夜總會演出，昨日驚聞噩耗後，小鳳姐也感到相當突然。
採訪： 魯吉、嵐山、陳杰、唐琛悠、皓騫
徐小鳳：「我哋做過同事，佢非常好，真係好突然。我哋一路都係工作上相處，佢非常熱誠、熱心幫人。有外來歌星去到佢熟悉嘅地方，佢都會照應，我印象中最深就係呢樣，佢好好㗎。真係好可惜、好突然。」
薛家燕：「聽到呢個消息當然覺得好難過，我喺麗的年代已經邀請佢做嘉賓，之後喺星馬嘅演出都試過同台。本來諗住搵佢做《流行經典50年》嘉賓，不過佢話身體唔係咁好，所以唔飛返過嚟唱歌，冇辦法，人生就係咁，真係好可惜。」
葉振棠：「感到很突然，曾經跟昌兄同台演出多次，最深刻是2000年在加拿大的一次，心很難過，願昌兄一路好走。」
黃夏蕙：「陰功，佢前年喺香港告別演唱會，跟住返咗大馬，上年我哋自費過咗去同佢做籌款演出，我哋知佢有老人病，雖然唔係窮，但退休咗冇嘢撈，大家都想幫吓佢。佢好好人，為人開朗誠懇，從不斤斤計較。」
呂珊：「真係好愕然，我𠵱家喺吉隆坡做緊嘢，本來諗住今晚去搵佢，點知今朝收到同事嘅通知。其實我次次嚟呢邊都會搵佢食飯見吓面，佢喺香港開騷，我都會做嘉賓，咁多年真係有好多回憶，我等佢嘅屋企人通知後事安排。」