【本報訊】上周一個凌晨，渾身髒透的L戴着防毒面罩，冒住疾風，走進理工大學某處渠口。水位上漲，他迫不得已脫下面罩，那陣令人透不過氣的臭味隨即讓他難以呼吸，遑論那些乘機爬上臉的曱甴。硬着頭皮走了半小時，他和幾位同伴勉強爬上地面，用僅餘的腳力跨過障礙，跑上接應的私家車離開，終於抵達「安全屋」，他二話不說衝入浴室，連沖五次涼，找回乾淨皮膚的感覺。
「我冇諗過沖涼係一件咁奢侈嘅事，𠵱家會好珍惜每一次沖涼嘅機會……」已穿回整潔衣服的L如是說。要冒着生命危險逃亡，只是不想投降、不甘心被無理控告暴動罪，雖然為安全計暫時有家歸不得，住進了安全屋，但L無悔曾在理大抗爭一役站到前線。
記者：于健民
也許是逃脫過程太驚險，L收到訪問邀請後不斷問記者，其他人知否他受訪？坐的士往訪問地點會否遇上「報寸」的「藍絲」司機？報道如何保護自己身份？刊登後若遇上危險該如何是好？記者用足兩天時間解釋後，他終答允受訪：「嗱，我搵條命嚟博（受訪），你一定要保住我。」
「只要唔投降，我都會試。我都冇扔汽油彈，點解畀差佬登記、告暴動、坐十碌？」
來到訪問地點，緊張得徹夜未眠的他換上黑色服裝、戴好口罩，坐穩後刻意拉低黑色鴨舌帽，再雙手緊扣。記者請他先憶述何時開始留守理大時，他立即更正：「唔係守，係被困。」自稱和理非的他續說，當日（11月17日）下午帶同物資到理大一帶支援，下午5時許想離開時，在A座附近遭防暴警阻撓，「之後一直走唔到，不斷見到班勇武小朋友真係好犀利，頂完水炮車，成身藍色慘叫住返嚟沖身，（我）真係唔忍心，又嬲，落咗去幫手頂吓」。
翌日（18日）早開始，抗爭者想盡方法突圍，L初時沒參與，「游繩就有，但知道嗰陣好遲，跑到去橋已經見到差佬射TG（催淚彈），加上現場話女仔優先離開，我諗自己都等得，所以返入去」。一等就是幾天，其間他與三名女士互相照應，眼見校園衞生環境一天比一天惡劣，「最深印象係大can（飯堂）成陣酸餿味，嘢食都發臭，咁大個人第一次聞咁臭嘅味，唔敢留喺度，唔好話食」。衣物要更換，他在臨時「衣帽間」見衫就換，大碼女裝也不放過，換好後就返回房間休息、想方法離開，餓了就吃乾糧，精神欠佳加上胃口差，有時數塊餅乾就夠捱一日。
L斷定警方不會貿然攻入理大，所以一度打算死守；但留守者越來越少，他只有再次思考逃離，「只要唔投降，我都會試。我都冇扔汽油彈，點解畀差佬登記、告暴動、坐十碌？」其間，留守者爬渠離開的消息不斷傳出、報道，有人成功、有人被捕、有人誤中沼氣而半昏迷。到上周一個凌晨時分，他決定隻身勇闖已穿幫的渠路，他說原因很簡單，「如果陸路走，俾警察射，我條命控制喺佢哋手；如果水路走，就算我跌傷死咗，條命控制喺自己手。我情願衰喺自己手」。
漆黑的校園裏，他剛好遇上幾位勇士，一同揭開渠蓋，人生第一次下探那更幽暗的空間。路線九曲十三彎、水位逐漸上漲至及肩，L很快要脫下防毒面罩，側着頭前行，盡量大口吸氣，「其實條渠好臭，不過聞慣咗大can嘅味，都唔覺得特別犀利」。走到中段，他身後傳出咕咕聲響，殿後的同伴開始呼吸困難，他立即捉實同伴、協助其理順呼吸，再慢慢前進；捱到後段，水位降至及腰，看似曙光將現，但腳下的泥沼異常厚實，每一步都踏得很吃力，一行人的體能也消耗殆盡。
約半小時後，「咚隆」一聲，渠蓋被揭開，L一行人小心翼翼爬上地面；來不及喘氣，便摸黑穿過雜亂的建築材料堆、竹陣，尋找等候多時的「車手」，「唔記得跑咗幾耐，總之去到，見車就衝埋去」。據說，這條水陸兩路逃亡路線，全長超過1.5公里，路途最遙遠、難度最高，也是最遲被抗爭者發現的路線；多個消息指出，數十人成功循此路線離開，L的一批幾乎是最後。
「第一件事就係去沖涼，沖好多次涼……我冇諗過沖涼係一件咁奢侈嘅事，𠵱家會好珍惜每一次沖涼嘅機會。」
一段時間後，L抵達安全屋，情緒才稍稍放鬆，「第一件事就係去沖涼，沖好多次涼，沖四、五次涼。好爽快、好舒服，但係好臭好痛。我冇諗過沖涼係一件咁奢侈嘅事，𠵱家會好珍惜每一次沖涼嘅機會……」整頓好後，他才安心致電家人，「同佢哋講，我真係出得返嚟、喺出面喇，唔係好似之前講，喺朋友度住呀……」說到這裏，他稍稍停頓，續說「到𠵱家都未敢返屋企，但會約佢哋出嚟見面。（有冇擁抱同喊？）一定有啦」。
L表示，逃離理大後，絕大部份時間不踏出安全屋半步，除了要外出用膳，才戴着那頂黑色鴨舌帽，低着頭在街上快步走。他稱不知這種擔驚受怕的日子何時完結，只能見步行步，但剛過去的區議會選舉，不論風險多大，他都去了票站盡公民責任，成功踢走建制派。
L多番指出，理大攻防戰中，有數以百計人士和他一樣，早在警方公開「呼籲離開」前已想走出校園，無奈警方執意「一竹篙打一船人」，結果想突圍的人更不怕生命危險、想死守的人更無懼環境惡劣，想和平離開的，也不甘願「投降」等着被控暴動罪。雖然家人飽吃驚風散，但L稱不後悔，「今日封鎖線係理大，如果冇人幫佢哋，他日18區繼續開花，差佬全港都set封鎖線，落街都告你暴動，到時乜都返唔到轉頭啦係咪﹖」
訪問完結後，記者打趣問：「嚟接受訪問危險啲，定係去票站投票危險啲，定係爬渠走危險啲？」L笑而不語，步出漆黑的房間，迎接室外的艷陽。