縱橫歌壇半世紀的「粵曲王子」鄭錦昌，昨早驚傳在馬來西亞家中病逝，享年77歲。鄭錦昌在1972年唱作歌曲《唐山大兄》歌頌李小龍，紅遍香港及東南亞，更因此與對方成為好友。好友邵音音昨日受訪表示，鄭錦昌近年患有腎病及糖尿病，每周要洗腎兩次，但依然勇敢面對，盡量跟朋友開心過日子。
入行逾50年的「粵曲王子」鄭錦昌，在1972年唱作《唐山大兄》歌頌李小龍，紅遍東南亞，擅寫廣東歌詞的他又唱作《十一哥》、《鴛鴦江》等名曲。鄭錦昌自前年在香港舉行告別演唱會後，正式退休，返回馬來西亞居住。昨日有消息指鄭錦昌昨早在馬來西亞家中辭世，享年77歲。其家人將於下周一在馬來西亞為鄭錦昌設靈，同日出殯。
每星期洗腎兩次
鄭錦昌近年患上腎病，最後一次出席公開活動，是參加今年9月大馬賀歲電影《大財神》的開鏡禮，本來他有份主演，但後來因健康問題辭演。好友邵音音昨日接受《蘋果》電話訪問說：「昌哥上年好刻意安排咗一班老朋友喺大馬同台做演唱會，當日昌哥喺台上講咗好多嘢，有佢對朋友寄語同祝福，佢人生好正面同健康，大家相聚那一個星期，我哋去咗佢屋企玩，傾咗好多以前嘅嘢。」
音音姐指鄭錦昌不但有腎病，近年又受糖尿病折騰：「佢都唔係好行到，嚴重到都唔想畀人知，佢盡量同朋友高高興興過日子。」她又大讚鄭錦昌是個有計劃的人：「佢安排好自己嘅生活，為子孫都安排得好好。佢好勇敢，一星期洗兩次腎，洗腎唔可以打止痛針，佢自己痛苦到不得了，佢活多一日，都寧願繼續忍受痛苦，將痛苦放喺自己內心，佢留低咗正面人生畀大家同歌迷。」老友走一個少一個，音音姐說：「呢啲冇辦法，我哋到咗呢個年紀，真係唔知邊個走先。」
好友馮素波得知鄭錦昌離世消息感突然，她憶起舊事說：「之前佢為咗照顧年紀大嘅母親所以返大馬，後來佢幫佛教團體錄歌，叫我過去幫手，我就過去。」波姐得知鄭錦昌有意重返香港樂壇便幫忙搭路：「當年高志森請咗鄭錦昌開騷，我做嘉賓，就係咁大家一路聯絡住。」她又慨嘆說：「個個人都要走，如果健康走就可惜啲，但病得辛苦咁支撐落去，安詳地走都係一種福氣。」
翻版碟贈李小龍
鄭錦昌的《唐山大兄》至今仍為人津津樂道，他曾接受《蘋果》訪問說：「當年睇完《唐山大兄》，覺得李小龍功夫好厲害，於是就照住劇情寫咗呢首歌嚟讚美佢。有次佢上《歡樂今宵》咁啱聽到，佢好鍾意，即刻搵人約我去半島酒店飲茶，但我因為做嘢去唔到。一個月後，我哋先至喺以前無綫木人巷碰面，佢好friendly，又握手又攬，跟住佢仲同我講：『錦昌哥，試吓打我個肚，大力啲！』第一次見面就好似識咗好耐嘅朋友。」
鄭錦昌又指：「後來李小龍又叫我送唱片畀佢，但我醒起《唐山大兄》隻黑膠碟原裝正版封面係冇佢張相，但翻版碟有，所以我就送咗幾張翻版碟畀佢，諗番起真係好好笑！」 之後鄭錦昌為《歡樂今宵》五周年台慶獻唱時，李小龍突然從一個大生日蛋糕內跳出來，兩人更同台表演。
採訪：陳杰、嵐山
