如果唔善忘的話，大家應該記得前特首梁振英因香港外國記者會（FCC）請香港民族黨陳浩天演講，連環炮轟FCC，更疑似逼特首林鄭月娥要收返FCC個會址，搞到成班外國記者相當火滾。八方以為689噚日去FCC演講、FCC點都會禮尚往來，追問689為乜要對FCC趕盡殺絕，點知最終不單冇人問，仲要全程配合689唔接受傳媒訪問要求，罕有搵職員鎖門阻記者追訪，究竟FCC係大人有大量，定怕咗689？
梁送書sell上海 曲線認叻
話說演講開始，FCC主席Jodi SCHNEIDER開場發言已多謝689同在席嘉賓，話佢哋令到該會食物同飲品委員會達到年底利潤目標，聲稱呢個唔係請689演講原因，但係一個意外收穫，惹來現場一陣笑聲，佢仲呵住689，叫在席人士問問題時要尊重689。
之後Jodi SCHNEIDER開始讚689，話好高興689接受邀請同發表演講，又話請689反映該會能扮演促進不同人士討論香港重要課題角色。佢話注意到689過去曾經嚴厲批評FCC，原因係佢哋過去選擇演講嘉賓嘅問題，話689噚日現身FCC，反映該會堅持言論同新聞自由嘅重要性。
講就講得好聽，不過去到答問環節，全程未見有人問及689係咪贊成政府收返FCC會址，FCC仲全程配合會前表明會後不會受訪嘅689，當689準備離開前， FCC職員突然關上記者所處現場嘅木門，阻止記者喺FCC入面追訪689，其實使唔使為照顧689要求、咁對在場記者？
講返個演講，Jodi SCHNEIDER喺689完晒個演講同回答提問後，即向689送上該會紀念品，689就回贈一本由「中共上海巿委黨史研究室」所寫、名為《破冰︰上海土地批租試點親歷者說》嘅書，689成日話上海批租土地試點佢有份推動，即係曲線想人知佢有幾威，但八方相信其實冇乜外國記者想知。
李八方