特首林鄭月娥力挺嘅警隊深得777真傳，喺connect港人方面功不可沒，最新力作就係令田家大少田北俊認同弟弟田北辰，八方真係好感動呀﹗
話說二少前日喺立會開光頭警長劉澤基拖，不點名話有人喺區選廢票數量上造謠，搞到選舉事務處要澄清，仲質疑有人「以下犯上」批評林鄭。二少冇點名，不過劉澤基崩口人忌崩口碗，喺微博點名叫二少睇吓佢個微博先，反駁自己冇講過777唔識執法或唔支持777，仲大大聲話「提出疑問代表在做（造）謠生事嗎？」叫二少做好本份先啦，臨尾加多句：「告訴你，你曾是我心目中一個十分欣賞的議員」。
對於劉澤基反擊，二少即時反駁指唔點名係唔想針對人，重點係如果有人對廢票問題有質疑又有證據，可以舉報，強調「唔係我話佢造謠，係政府個聲明話有人造謠」。再者二少針對嘅係制度，既然政府唔接受公務員公開發表政治意見，係咪有啲公務員可以發表、有啲又唔得先？或者微博發表就得、facebook就唔得？
二少呢番話，幾個鐘就有700人like，但人數唔係重點，其中一位網民留言俾咗三隻手指公二少，佢就係哥哥田北俊。一切盡在不言中。