【屯門】呂慧儀有「長腳蟹」之稱，現年37歲嘅佢離婚回復單身後，一直被傳同劇集拍檔張景淳撻着，今年7月二人更被《蘋果》讀者透過「爆相爆片」踢爆喺數碼港戲院手拖手睇戲，之後四處覓食，再一齊返回女方屯門香閨。日前佢哋再被發現去屯門睇戲，更前後腳入場同離開，低調約會。
打扮樸素
日前有讀者報料，話見到呂慧儀同張景淳喺屯門睇下午4時20分開場嘅電影《犯罪現場》，兩人分別戴上cap帽，打扮樸素掩飾身份，又前後腳入場。散場時，本報記者見到呂慧儀一個箭步離開戲院，行去附近嘅露天停車場攞車，行去攞車期間，呂慧儀警覺性極高，不時邊行邊撳電話。
呂慧儀上車後，先將車泊喺路邊，等了十分鐘仍未見張景淳蹤影。原來張景淳喺呂慧儀離開戲院後十幾分鐘先離開戲院，到咁上下時間呂慧儀開車，兩人於新墟街市嘅上落客位會合，默契十足。
合照任睇
呂慧儀喺2011年同前港男黃文廸（Dickson）結婚，之後生咗囝囝柏翹，婚後女尊男卑，呂慧儀經濟能力明顯比老公高，但佢一直力撐老公，直至今年3月Dickson被《蘋果》踢爆喺巴士上啜女，最後佢哋發聲明表示兩人喺2018年已經變回朋友關係。之後呂慧儀同張景淳傳緋聞，但佢哋一直話只係好朋友、好拍檔，兩人相處亦冇因為咁而避嫌，索性將計就計，經常喺網上晒合照。