中共滲透本港傳媒業，尤其近日選舉來了，甚至有傳媒列出「不支持候選人名單」，阿爺一吹雞就全部歸晒邊。喺極權者眼中，唔聽話嘅《蘋果日報》係「黑記」；但喺民主社會眼中，係叫「自由媒體」，唔係八方自己講，而係出自台灣外交部長吳釗燮口中。
吳釗燮噚日見記者評估香港一國兩制實施情況，提到香港媒體自由，由於中資滲透越嚟越嚴重，唔少媒體都有自我審查，情況令人憂慮。吳釗燮話，好多人話香港得返一間自由媒體，就係香港《蘋果日報》，而老闆、員工同記者都因為不屈服於中國威逼下，受到一啲暴力對待。八方覺得吳部長有少少言重喇，其實好多媒體前線記者都好專業，同樣都要面對瘋狂警暴同子彈，出問題嘅只係染紅既高層。八方都聽唔少行家訴苦，用一日血汗採訪嘅新聞做唔到A1，頭版結果登左一張「止暴制亂」廣告，行家笑中帶淚咁話，嘔埋啲血捐咗佢唔好？