警車警示燈閃爍着，劃過深水埗黑夜的街頭，路上鐵欄仍未修復，39歲的張汛珩（Cary）從北河街體育館離開，走過這個瀰漫刺鼻催淚煙的重災區，帶着疲倦身軀回家。這位大叔跟年輕人一樣愛追夢，但他的「奧運夢」發得特別遲。35歲那年才由拳擊初哥做起，捱過四年艱苦訓練，終在上周五打出漂亮一仗，爭取到明年2月武漢奧運外圍賽入場券，跟同樣有個奧運夢的「神奇小子」曹星如在不同級別出戰。雖然他深知能踏上奧運擂台是異想天開，但對他來說不僅是第一次，更是最後一次，「40歲冇得再打業餘拳擊，呢個係我最後一次機會，為香港而戰！」
記者：郭美華 李晟謙 黃學潤 張 軍
眼前的Cary左眼被打得瘀黑，但配上一雙拳套和boxing戰衣，露出爆肌雙臂已瞬間「man爆」，展現出四年來血與汗交織的成果。35歲前的Cary是個普通白領高層，代理箍牙產品，曾與人合夥搞IT生意，收入可觀，生活穩定。不過，一次朋友帶他到拳館試玩拳擊，人生就隨之改寫。
「第一次打比賽好緊張，真係唞唔到氣，緊張到發揮唔到，硬晒」。2016年拜師第一年，他就在深水埗區計分賽取得亞軍，注入一支強心針，並展開職業拳手之路，更由70多公斤一路減磅至60公斤；翌年更摘下香港盃60公斤金腰帶、第三屆香港盃國際拳擊邀請賽60公斤冠軍。
遺憾錯過兒子成長時刻
「我選擇咗呢樣嘢就要做到最好，呢個係我性格，唔會令自己後悔！」為了不留下遺憾，Cary作為拳界「高齡新丁」仍決意勇闖明年7月東京奧運，遂於今年初決定辭去高薪厚職，全職集訓，更不惜傾囊25萬元參加香港拳擊總會開辦的京奧拳擊培訓隊計劃，4月起至明年7月分別在中港及外地訓練。
Cary直言起步遲，無論訓練體能、技術樣樣都難。現時每朝5時起床跑步，然後訓練體能，午睡個多小時後，下午到體育館操拳，生活只剩下訓練與休息，「出面好多對手至少有10年經驗，由細打到大，我要追返要更加努力！」加上要限制飲食，斷絕所有夜生活，連好朋友也幾年沒見。
一切犧牲也比不上對兒子的內疚感。兩年前兒子剛出生，「好多moment因為我操緊拳而miss咗，有好多個first time，第一次嗌爸爸呀……你會希望每一分鐘都可以陪到佢」。太太對他的體諒和包容更令他感激不已，「我食同瞓佢睇得好緊，好感激佢！」惟這一刻，Cary認為無一件事比奧運夢重要。
為了一登奧運擂台與國際級拳手較量，Cary傾盡全力，上周五於香港區選拔賽63公斤男子中量級挑戰本地四屆拳擊冠軍的35歲袁文俊，爭取明年2月代表香港出戰武漢奧運外圍賽資格。鐘聲一響，穿上藍色戰衣的Cary首回合就主動出擊，向對手步步進逼，睇準對手防守空隙發力進攻，僅花三分鐘竟將對手「打爆缸」；次回合依然打得漂亮，但至第三回合明顯氣力不夠，師傅和曹星如不時在台下大聲指點，Cary終穩住節奏，抵住對手最後一輪攻勢，最終驚險勝出。
裁判宣佈賽果一刻，全場歡呼聲雷動，Cary急不及待衝去觀眾席緊抱太太。雖然臉上有多處傷痕，左眼皮瘀腫並流鼻血，但無損其出線的興奮心情，「真係好開心，尤其家人犧牲咁多支持我！」Cary勝出來得不易，全賴在集訓班能跟「師兄」曹星如一起操練，「喺佢身上學到好多，今次（選拔賽）佢都提醒我好多，好多謝佢！」
雖然出戰奧運只差一步，但要在外圍賽打低國際級勁敵可謂難過登天，歷來代表香港出戰奧運拳擊賽的只得曹星如師公、南華會拳擊部創辦人羅漢北，他參加1964年東京奧運雛量級賽事，惜在16強止步，之後13屆均未有拳手成功突圍再闖奧運。
正如很多發夢者一樣，Cary深知實現夢想不易，但一想到是為港而戰，他決心勇往直前：「做人就係難，所有嘢都難，但如果有希望，有個夢想，盡量去做好，無論幾難都可以試吓！」