美心太子女伍淑清（圖）狂撐警，搞到美心旗下店舖先被罷食再被裝修，呢幾個月損失條數有排計，但呢頭美心輸錢，伍淑清就贏掌聲，佢入選咗最新「感動中國2019年度人物評選」，仲係21個候選人中唯一香港人。
國家級認證
不過，佢獲得提名，美心應該更頭痕，如果最後攞埋獎更會打冷震，要預備定新一輪裝修潮來臨，事關呢個係嚟自中央廣播電視總台嘅年終節目之一，完全係國家級認證，佢哋每年會喺社會唔同行業推選出十個震撼人心、令人感動嘅人物或者群體，伍淑清之前瞓身去瑞士日內瓦聯合國為特區政府護航，又炮轟年輕人話放棄佢哋，喺黨嘅眼中又真係好鬼感動嘅。
再睇埋張入圍名單，除咗衞冕女排世界盃嘅國家隊、撲救林火犧牲嘅四川森林消防員，仲有接力守護國旗70年嘅澳門中學校長同埋戰鬥英雄等，似乎伍淑清嘅付出都唔係好大啫。