【寢食難安】
【本報訊】理工大學上周日被警察封鎖圍攻，逾千人被困，包括過百名中學生。其中16歲少女A和阿明（化名）多次冒死逃走失敗，身心瀕臨崩潰，全靠手足扶持，才能在煉獄中撐過來。縱使兩人最後平安回家，卻記掛仍在理大的手足，愧疚難耐，寢食難安。
A記得，理大封校翌日清晨，曾與手足舉頭望天，似乎看見一顆流星。眾人笑說：「有救星嚟到啦！」不久後速龍強攻校園，催淚彈爆破巨響不斷，A驚恐症發作，邊哭邊全身發抖。被困兩天，逃脫不果，A幾經掙扎跟隨中學校長離開理大。她自責是逃兵，臨行前向手足下跪痛哭，「我會內疚一世」。
記者：周婷
11月14日，星期四。隨着中文大學局勢轉趨平靜，A離開中大，到理大幫忙準備物資，初時留守人數比較多，她在理大和家之間來來回回。
11月17日，星期日。警察突然封校，留守者開始擔憂，紛紛想方法逃脫。A說，哨兵通報警察在不同位置佈防，還有水炮車、裝甲車。留守者很緊張，她主要在理大A Core附近戒備，「要打醒十二分精神，因為唔想有任何傷亡」。A在理大遇過最年幼的留守者讀小六，家長在「守護孩子」成員陪同下在A Core等待，小六生則在漆咸道南十字路口交界守着，「家長好擔心，但（A）知道自己冇辦法叫小朋友離開，所以都係睇住佢」。
11月18日，星期一。清晨6時許，速龍首次攻入理大爆發大型衝突，催淚彈、布袋彈不斷，「我哋以為係由漆咸道南射過嚟，點知係由博物館道高處向住A Core發射……我好驚被射中，或者會死」。A雖僥倖避過速龍，但驚恐症來襲，「我好驚，成個人震晒」。
油麻地人踩人，有人俾催淚彈射中，但佢哋都嘗試攻入理大救我哋，用十年（判囚代價）嚟救我呢啲懦夫……其實我值唔值得佢哋幫？
警察一輪強攻過後，理大校園短暫平靜，A稍事休息後暈眩，突然感到絕望。她本身有抑鬱症，需長期服藥，但沒想過會被困，身上沒足夠藥物，「當時覺得好多方法都走唔到，繼續留喺理大，覺得自己會有生命危險」，這是她第二次驚恐症發作。「衝突之後，尤其係女仔，喊得好緊要」，絕望之時，A與一樣害怕的新相識手足互相安慰，邊哭邊說：「一定出得返去！」
絕望的兩天，A身心煎熬，加起來只睡了一、兩小時，幾乎沒有進食。她用過不同方法逃生近十次：爬渠、游繩、行路軌、穿草叢，統統試過但失敗。所有人視游繩為最後逃生希望，「因為個位置比較易上家長車，（留守者）都讓畀女仔走先，我都有排隊，但下一個到我游落去時，警察開始不斷放催淚彈……事後知道，我前幾個女仔都拉咗」，「每次（逃走）都係五十五十，每次都好似有希望，但最後係失落」。
星期一晚上，A的手機不斷傳來朋友鼓勵：「加油，頂住！」又收到一張又一張彌敦道站滿人的相片，「油麻地人踩人，有人俾催淚彈射中，但佢哋都嘗試攻入理大救我哋，用十年（判囚代價）嚟救我呢啲懦夫，（就算）我出到嚟，但佢哋就俾人拉，其實我值唔值得佢哋幫？」
我好想入去救佢哋，但我冇方法，無力感令我痛苦，亦令我更憎恨政府，點解一條逃生路線都唔畀佢哋？
11月19日，星期二。一批中學校長連同教育界議員葉建源入理大營救18歲以下青少年，離開者毋須即時拘捕，但要登記身份證，警方保留追究權利。A凌晨跟隨中學校長離開理大，這個決定教她內疚至今。A一直視此離開方式為最差方案，她不想成為逃兵，「可能我自己唔夠叻，我好廢，因為我情緒好唔穩定，好辛苦，先決定用呢個方法出嚟」。
「我好記得跟校長要經A Core出嚟，當見到其他手足戴晒gear同豬嘴，有救星嚟嗰時就可以衝出去，我企咗喺度，甚至跪低咗，同佢哋講對唔住。我話我唔配做佢哋嘅手足，因為我用一個咁羞恥嘅方法去離開」，一名不相識的手足見A哭得厲害，抱着她說：「保命更加緊要，如果你真係捱唔住，不如你出去先啦。」
11月25日，星期一。A「重獲自由」第七天，接受《蘋果》訪問。當天理大尚有十數名留守者，每當A看到此情此景，例如被困手足用燈砌成「SOS」字樣，都會崩潰痛哭；她最想跟留到最後的手足說對不起，「我好無力，我好內疚」。這幾天，她不由自主地走到理大外圍，想跟他們近一些，「我好想入去救佢哋，但我冇方法，無力感令我痛苦，亦令我更憎恨政府，點解一條逃生路線都唔畀佢哋？」
我哋都唔知幾時可以完，但係我相信會有呢一日發生，因為香港人好清楚自己守護緊乜嘢。
A一輩子無法忘記理大一役，「如果我冇抑鬱症，我一定會留低陪住手足」。心理創傷揮之不去，「食嘢唔係好有胃口，理大手足都係食緊麵包，自己點可以食一餐好？總之做每件事都覺得對唔住入面嘅手足」。以往可在漆黑中安靜入睡的A變得怕黑，「凌晨（速龍）突襲係一個好黑嘅環境，好似有恐怖分子衝入嚟，所以我𠵱家點都要留一盞燈」。
很多人勸A離開香港到外國升學，「但係呢班手足令我唔想離開呢個地方，我成日講『Freedom is not free』，喺極權國家就係要付出代價」。她希望將傷痛化為動力，「好似德國柏林圍牆，啲人都唔知有日會推翻，香港人都唔會知，可能聽日就會推翻高牆，條路可能好漫長，我哋都唔知幾時可以完，但係我相信會有呢一日發生，因為香港人好清楚自己守護緊乜嘢」。