【大放厥詞】
【本報訊】何君堯憑着仇恨民主派出位言論，令他成為極左人士寵兒，他以為憑鐵票足以在區議會選舉連任，結果卻遭民意海嘯殲滅，以逾千票大敗於民主黨盧俊宇手下。由「何議員」變成「何已完」，他在立法會接受《蘋果》訪問時承認，7.21與白衣人合照對他造成重大打擊，但仍不改其言論惹火本色，一時指《蘋果》寫得他「戇居、笨星」影響年輕人對他觀感，一時又指年輕區議員「喺屎渠擒咗出嚟」也勝出，「咁你洗乾淨個身，做好自己本份」，無視再惹年輕人不滿。
記者：林俊謙
何君堯在屯門樂翠選區遭盧俊宇擊敗後，一直未親身回應敗選，他昨於立法會接受《蘋果》訪問時指，相信自己落選，與年輕人「求變」客觀環境有關，而他主觀上也有「改好」空間，至於年輕人為如此討厭他，何除歸咎年輕人「未有機會同我傾偈」，又認為與《蘋果》有關，「年輕人如果通過你哋《蘋果》（了解何君堯），你哋唔使寫到我咁戇居、咁笨星或者咁形象唔健康等等，都會有一個正面嘅影響」。
「人哋叫影相 無理由唔影」
除了年輕人不滿，何承認7.21恐襲中被拍到與白衣人握手，也對選情造成「好重創傷」，批評多間傳媒將合照一事「放得好闊」，失去理性分析和刻意抹黑，又指7.21事件「入市民個腦好容易」，「你（傳媒）渲染得咁犀利嘅時候，啲人唔會有時間做分析，仲要個個標題都咁樣，唔係一間，係兩間、三間（傳媒）都咁講，呢個等如係曾參殺人，但曾參根本無殺人，個謠傳話畀佢阿媽聽曾參殺咗人，佢第一次唔信，第二次開始動搖，第三次自己都走咗佬，所以呢個好正常」，他表明不後悔與白衣人合照，重申不知道與他握手白衣人「做乜嘢」，「人哋叫影相，我無理由唔影，影完咪走囉」。
對於外界指建制派大敗與主打「止暴制亂」有關，何絕不認同，反指社會撕裂和矛盾存在已久，負面能量累積到一段時間自然爆發，又不忘批評「政府嘅教育同年輕人工作係非常失敗」，相信市民未來只能期望政府「少做少錯」。
諷當選者「屎渠擒出嚟」
至於早前遇襲事件，何稱或令他賺到「同情票」，但肯定非選舉工程：「邊個會願意用自己嘅生命，去換呢啲同情票？」強調會續在樂翠服務，「我唔會咁現實，冇咗個位就即刻走，咁我（立法會選區）始終都係新界西吖嘛！」他祝願新當選盧俊宇工作順利之餘，又希望新當選的年輕人不要「自暴自棄」：「你喺屎渠擒咗出嚟，都有4,800票嘅，咁你洗乾淨個身，做好自己本份，咁人就進步啦嘛」，又稱期望在野的建制派和執政的民主派在區會合作，「我何君堯肯定唔會蹺你（當選人）腳、我亦唔會阻你，如果有啲咩你要幫，我幫得到，我會幫埋添」。