民主派區選大勝而回，但每一議席背後嘅代價，都係手足嘅血汗生命，所以各人短暫慶祝後，呢幾日開始沉澱點樣利用未來資源壯大抗爭力量，以至從社區開始改變現狀。
提醒同路人勝不驕
有同路人提醒各人唔好俾勝利沖昏頭腦，其中做區非常出色嘅區諾軒，拎番07年慘痛教訓嚟互勉，當年民建聯曾鈺成專登寫文用「來如春夢，去似朝露」嘲諷泛民，區諾軒從中再寫咗篇千字鴻文，提各人毋忘當年敗陣教訓，用心努力經營地區，仲引述中文系同事一句「未覺池塘春草夢，階前梧葉已秋聲」回覆曾鈺成。
究竟民主派可以點喺區議會重新出發，做到共產黨最驚嘅農村包圍城市策略？呢幾日網上有唔少友好集思廣益，盡快用區議會名義通過支持五大訴求幾乎係基礎共識，有人提議十八區設抗爭女神像，所有區議會活動亦要播《願榮光歸香港》，藍絲會唔會被迫癲㗎？實務方面，有人話要各區警署拆走門口阻街水馬同中聯辦外個阻碇花槽；抗爭運動重要文宣渠道連儂牆，咁區議會不如喺社區設立官方版，市民可以實踐發聲，仲可以學吓彼此尊重囉。
大家當然唔會放過警察，壓倒性意見認為區議會要追究佢哋點解可以亂向民居射催淚彈，聽講已有候任區議員打算次次開會，都要當區指揮官出席解畫，睇嚟未來四年，八方都要多啲睇區議會消息，因為大量好戲碼勢陸續上演。
李八方