【本報訊】區選投票當日，撐警導演李力持於facebook出帖，圖文並茂將觀塘啟業民主黨參選人尹家謙的一叠宣傳單張掟入垃圾桶，聲稱要「趕絕犯民」，結果當日4,433位選民撐尹入議會，趕絕民建聯候選人。29歲的尹家謙對被「招呼」感詫異，坦言要將李力持「染黃」有難度，因為「詐瞓嘅人叫唔醒」，直至「佢哋俾個國家機器迫害先會改變睇法」，但已為候任議員的他仍希望透過實踐地區工作，撼動諸如李力持般藍絲。
揚言入議會繼續抗爭
以約600票力壓建制對手當選的尹家謙接受《蘋果》訪問時坦言，對李力持將其宣傳單張掟入垃圾桶感詫異，「我哋啲文宣喺唔同日子派發，佢都特登收藏起晒，等嗰一日揼落去」，笑指：「咁睇得起我。」他強調文宣一字一句都是心血，冀選民看清楚其理念或地區工作，「如果睇完都覺得係垃圾就冇辦法啦，我哋從政都係憑原則憑良心做事」。
要將藍絲變黃絲，談何容易？尹坦言「點樣軟化（李力持）呢個問題都考起我，（要）佢哋自己俾個國家機器迫害先會改變睇法」，他稱遇到原親中街坊因政權暴力鎮壓年輕人而覺醒，但裝睡的人永遠叫不醒，「有啲人覺得警察做乜都啱嘅都冇辦法，希望李導能夠睇多啲真實畫面，唔係信晒其中一邊，希望你能夠明白點解年輕人會上街抗爭、點解今屆投票率咁高？正正顯示社會幾咁不滿政府」。
畢業後在民主黨主席胡志偉辦公室擔任社區主任三年，尹稱最大信念是民主由地區扎根，「沒有民主就沒有民生，相信有民主、政府傾聽人民聲音，先至真正改變到民生」，他認為勤力進行地區工作始終是撼動藍絲的基礎，「除咗用心工作令佢認同你嘅工作，勝利都冇乜不二法門」。他指選區內有兩個舊屋邨，會投放心力多做老人服務，爭取老一輩認同，「因為有啲飛（票）我哋叫雷打不動，佢認住呢個人，尹家謙、謙仔幫到佢所以投畀我，其實呢啲飛好重要」，指社會回歸平靜，沒有反政制票源下就要鬥「鐵票」。
他同時指議會工作要兩條腿走路，抗爭與民生缺一不可，明言會將抗爭聲音帶到議會，杜絕「警謊」，包括動議支持五大訴求，追究警暴，冀外界不再覺得區議會是「和稀泥」及橡皮圖章，「喺議會用得到嘅權力都會用」。
■記者梁穎妍