愛國護旗手陳小春同太太應采兒多次喺微博表忠，但身體好誠實，兩人冇安排6歲囝囝Jasper到自己最敬愛嘅祖國讀書，反而選擇到台灣升學。有台灣傳媒報道，Jasper喺媽媽應采兒護送下，喺台北一間貴族老牌學校返學，而幼兒園一個學期嘅學費約2萬5千港元。
為慳35萬債券
小春夫婦送Jasper去台灣升學，除咗因為香港政府硬推惡法「製暴製亂」同警方狂放催淚彈，令生活環境大受影響外，《蘋果》收到消息，原來都同學費有關。Jasper原本喺九龍塘讀嘅國際學校，該校自幼兒園到中學採取一條龍服務，其中小學部每年學費23萬，仲要購買35萬債券。據悉小春因為嫌貴唔想買債券，加上種種原因，所以決定送個仔去台灣升學。
消息傳出後，唔少網民喺應采兒Ig留言寸爆︰「不是很愛抱內地大腿嗎？去內地讀書啊！跑來台灣幹嘛？」、「怎麼把自己一家在香港搞得像過街老鼠」、「撐港警然後全家搬來台灣？笑死」、「點解唔返內地讀書？唔係愛國嘅咩？得把口？」、「護旗手就回內地，不要來台灣，我們不歡迎你們」。
撰文：馮仁昭