人氣ViuTV選秀節目《全民造星II》前晚播出40強爭入30強，導師火火、陳潔靈同郭偉亮（Eric Kwok）分別負責A、B、C三組，結果陳潔靈主導嘅B組輸咗，要喺20個隊員中淘汰10個出局，有唔錯表現嘅阿Lu、Benson同Eagle被叮。有網民喺官網為佢哋抱不平，留言話表現差嘅George有得入圍。其實陳潔靈都想out走George，但懷疑監製「花姐」黃慧君偏心George，左右陳潔靈意見，最終George先有得留低。
名額不減反加
另外，網民又話花姐安排組合MIRROR再參加《造星II》，成員姜濤、Stanley、Lokman、Anson Lo、Ian、Edan、Frankie、Jeremy同Jer都可以順利晉身30強，霸住入圍名額，令到唔少有潛質參賽者入唔到圍。花姐噚日接受訪問就話：「上年呢個時候係20強，𠵱家係30強，MIRROR只係佔咗9個位，就算冇MIRROR，我都仲有21個名額，比往年多，如果唔係因為加MIRROR入去，其實連嗰10個位都冇，我唔單止冇cut到，而且仲加咗㖭。」
至於網民質疑偏心George兼左右陳潔靈意見，花姐激動否認：「我可以發誓，我從來冇干涉賽制，導師接觸參賽者冇我咁多，所以有時會搵我入房問我佢哋平時有冇遲到，同埋為人點，我從來冇叫導師揀邊個。我只係一個監製，點可以左右賽果？我只係想做好個節目，大家唔需要諗得太複雜。」
撰文：馮仁昭