讓榮光歸區會，民主派在區選後成功控制17個議會，噚日好多網民討論，不如以後區議會開會前，都唱返首《榮光》，又有人提議區區有會歌、新會徽同波衫。係咪聽落都覺得好work好有新意，但原來條「絕橋」係「前白宮發言人」馮煒光度出嚟，難怪好多連登兒女都要講句「多謝提水」。
事緣馮煒光噚日喺文匯報寫文，話反對派「不是省油的燈」，拎到17個區議會主導權之後，下一步會奪取特區管治權咁話，仲講到部份議員會將「光復香港」同《榮光》，變成區議會嘅會歌同口號。好多網民即時眼前一亮，大嘆真係冇諗過可以咁玩，到時區區唱《榮光》，唔知班少數親共派會唔會陪唱。
馮促就任前宣誓效忠
又有人多謝呢位「前資深議員」嘅提醒，靈機一觸，話議會加足球，呢條橋有得諗，建議新任候選人要整返隊地區足球隊改會徽，有新波衫，新會訓，好似加泰人自己嘅球會巴塞咁。
雖然馮煒光有份助攻做軍師，但有錯都係要fact check，佢話要新科議員就任前，逐個宣誓效忠中華人民和共和國， 擁護《基本法》，公開譴責「港獨」，但根據現時法例，區議會就任毋須宣誓，想借機DQ班議員，冇咁易囉。
李八方