乍見「民主派海嘯式勝利」的新聞標題，心想有冇咁誇張啊，直至看到那張有如電影院座位表的議席分佈圖，驚心動魄滿江黃，先至明白記者形容得冇花冇假。可笑新民黨全軍盡墨，身為掌門的葉劉還要死雞撐飯蓋，背人是否學哽咽皇后垂淚不得而知，面對記者則天花龍鳳，鄭重否認撐警招致滅亡之餘，不忘貫徹賴三賴四的推卸責任作風，抱怨這次區選「政治化」。哈哈親愛的利專娜，你以為自己經營的是馬戲團抑或大陸電視台真人騷，選舉不政治化，難道應該娛樂化？指黨羽其實得票破紀錄，「只因投票率高才敗落」，究竟算什麼邏輯，豈不是鬼拍後尾枕，曲線話畀大家知你哋班友仔極度不得民心，除非小圈子黑箱作業，否則點都冇機會跑出？唔出聲冇人話你啞㗎，既然立定主意表演眾雞死一雞鳴，唔該做吓功課先啦。
此類香港政治動物的思維，正常人完全無法想像，明知中環午飯時段有「和你lunch」，竟然選擇在鬧市飾演過街老鼠，簡直屎忽痕。雖然祭出「卿本佳人，奈何牙痛」的偉大藉口，因口腔出現緊急狀態不得延醫，黑超口罩冷帽這些小道具總不會沒有吧，裝修一下門面才獻世不好嗎？咦，莫非是眼紅倫敦仆街的鄭姓港官，專登抬塊面出嚟博打？有佢咁奸冇佢咁肥，葉太你唔恨得咁多，不過話時話，嗰條政壇陶三姑又真係幾抵得諗，跣一跣腳打蛇隨棍上，鬧完「暴徒」一不做二不休放其大假，揚言要唞三個月至一年喎，就算當地醫生話佢冇事，而且被踢爆着咗件一般手臂甩骹者無法鑽入嘅過頭笠樽領曬命，佢都一於充耳不聞。