我們都是吳若希。面對紛紛亂世，千絲萬縷，有人扮智者，有人扮無知，到頭來，心底裏只能問：「點解嘅？」
甄澤權說：「《街頭魔法王》節目裏，吳若希在旁邊搞氣氛，不停點解嘅，其實我聽不到，因為那刻我專注着表演，睇番playback才知，真太多了。」
我們多麼渴望數月來只是一場超巨型戲法而已，手指一彈，魔術師告訴觀眾，全部假的，不用再問點解嘅，就好了……
37歲的甄澤權剛當選十大傑出青年，厲害在，他向評委示範一項給失明人士感受的魔術，甚至可以教失明人士玩，想想便不得不佩服。
Magic moment，咩都有可能。
但願香港也見奇蹟。
撰文：余家強
攝影：羅錦波
魔法校園
回到校園。魔術師之路，由浸會大學開始，當年他攻讀市場學系副學士。甄澤權（Louis Yan）這天坐在Canteen指着天花板道：「魔術學會會址就在樓上，我是第二屆主席。
「我問師兄師姐，原來魔術無人搞過才搞，即是大家都唔識，成班莊員同步搵書、睇影碟研究，那時網上資訊很少，只能掌握基本概念，自行摸索。」
筆者（相信很多男生亦然）想過學魔術𠱁女仔──講到尾都係靠手快？
甄澤權道：「除了快，更重要在真。魔術本身一定是假的，但如果你驚驚青青，或者態度懶懶閒，唔尊重，觀眾首先已唔信。要建立一道氣牆，真嘅一樣。」
話雖如此，他一邊說一邊掌上玩弄一蚊銀，翻來覆去，倏隱倏現，談笑用兵。明明近在眼前，睇唔穿硬係睇唔穿，我幾乎忍不住便要學吳若希，便改口問：「點解……畢業唔考慮做marketing？」
Louis說：「當初正因為唔知自己想點，才揀市場學，市場學應用在乜都得。參加多次聯校活動，獲得稱讚，有了信心。畢業我扮搵過其他工，應付吓屋企人，其實我決意做職業魔術師。」
市場學
Marketing教識他，揭黃頁，酒店、PR公司、主題樂園逐一send履歷自薦去表演，向中小學則自薦去教課外活動，康文署屋邨show也去，看似線路多多，計落卻一個月都無一單工作。
「魔術自古存在，但風氣很重要，圈子細，等如晚會一定有唱歌，卻很少有變魔術，其實本質上一樣可以，突破了，成為習慣，後來，舖頭開張、馬拉松起步都加插戲法，視乎肯試箒。」
傳統魔術師穿禮服，甄澤權穿皮褸；傳統戴高帽，他不戴，還捋起衫袖，寓意減少遮掩，向難度挑戰。
另一瓶樽在教與學。
這業界，全憑默契永續。
甄澤權說：「魔術師之間有共識，某些眾所周知的小把戲可以公開，壓箱本領絕不可以。」那為何有明珠台的《解開魔法陣》（Breaking the magician’s Code）？「直頭我們公敵啦！私底下傳授又唔同，但都要篩選學生，會測試吓新人，先拿些非關魔術只關恒心的東西去教，連恒心都無就請回，加入了本行即不能洩漏本行秘密，無謂破壞觀眾fantasy嘛，連家人都別透露，有點似天地會。
「魔術無得註冊專利，行家睇完領悟箇中竅妙，抄咗咬佢食，但業內會怪責的，有能力不如自己創作啦。」他說時嬉皮笑臉，硬幣忽爾變入他剛喝完的可樂罐，搖晃得噹噹響。我一手想搶過可樂罐，他閃電收回。
點解嘅？真需要咁嚴嗎？又真忍得住口嗎？
甄澤權說：「我初學時也禁不住朋友再三詢問，朋友本來很興奮，聽完『唓』一聲，平淡了，唔講反而受尊重，明明上一刻還虛心請教。世情往往如此，拆穿了不值一笑，坦白只會累咗件事。」
評論別的總可以吧，例如四川變臉，神乎其技，能提供線索嗎？
「同屬於魔術，它不叫自己魔術，總帶個『變』字，既然變，我們便大致知道，卻正因為知道，也不能講。中國傳統有戲法，但劇場藝術是西方發展得較完整，現代魔術師都學西方的。」
不只忍自己口，還忍行家口，同行不如敵國。
「你踢爆人，大家不單覺得那魔術師渣，是整個界別渣，識咁諗自然守規則。」
練習失手
而且這行抗逆能力特高。
「有次因為緊張，剪條繩剪傷埋手指，the show must go on，條白繩一路被鮮血染紅，唔知算否魔術罷了。你問我怕不怕穿崩？我們練習要練埋執生──想像晒在哪些情況下可能失手，失手後應該詐唔知抑或扮專登都預埋，結果仍會有意料之外，人生都係咁，但你盡量小心囉。
「替TVB做《街頭魔法王》，構思過很多方案，大部份實行唔到，環境限制、唔夠budget，只不過大家只看到成功個案，以為很容易。」
幾富啟發意義。
「大型魔術，類似變走架巴士，電視台要控制成本，早期我亦無錢，便玩街頭即興，其實美國90年代已經流行，然後到日本，掌握基本概念，創新還得靠自己，我加入本地文化元素，在茶餐廳變奶茶，在金魚街變金魚，唔掂諗到掂。當年一起學的莊員都話我：『得你肯堅持做。』」
勵志到配選傑青。
Louis道：「第一次遴選，見會計師，逐一核實履歷和所獲獎項，不用變魔術。
「第二次，五位評判，像見工setting，我成世人未見過工，緊張起來。談及魔術師對社會有甚麼貢獻，我說：『容許我表演嗎？』我去過心光盲人學校探訪，校董戲言可否讓學生開眼界，我話why not。看不見，但皮膚有質感，我便設計一項他們feel到手上啤牌變至別人手上的魔術。傑青現場又給評判示範一次。」
常言道掩眼法，向盲人變魔術應該不難，難在咁都諗到。
「我還會教他們自己變，玩顏色card。我無法令盲人看得見，但那一刻可令觀眾相信盲人看得見。」
信得過
甄澤權說，他有個道具倉，或者叫藏寶庫，身家性命都在那裏，謝絕參觀，連位置也不能透露。
這男人，說話時常常單邊眉毛一掀，世界仔模樣。
這男人，今年才剛結婚。
這男人嫁得過嗎？魔術師總是滿肚密圈，甚至眼前件衫真係件衫咁簡單？幾許機關在內？他會背信棄義向太太分享秘密？抑或必要時殺妻滅口？
「老婆每次做我第一個觀眾，她通常只批判、潑冷水，話：『普通啦。』卻從不想知道原理，係魔術師的理想老婆。逆向思維，魔術師很嫁得過，而且是最信得過的好朋友。」
再一次，我衝口而出：「點解？」
甄澤權正色道：「朋友想傾訴時，會告知我：『你咁守得秘密，唔爭在幫我守多個……』」
信不信由你。
後記
採訪拍攝於浸會大學的下午，當日早上，梓樂過世，同學們感同身受，校園風風火火的，三五成群正籌劃行動。
助理向我附耳說：「影夠好走了，剛才有學生叫嚷：『TVB竟敢來拍嘢！』」只怪《街頭魔法王》太深入民心，其實Louis Yan不是大台正式錄用的員工，今次更絕非為其工作，相反，在接受被其杯葛的機構（壹傳媒）專訪。
我表明身份好不好？又輪到我和攝影師並非壹傳媒正式錄用的員工喎（筆者是特約主筆），攞唔出記者證，有理說不清。世間事，弔詭至此。
第二天，攞着記者證的TVB記者果然遇襲，雖不關浸大學生事。
才真箇咩都有可能。
甄澤權2012年曾經以原創方式成功預測六合彩結果。我不求橫財了，但衷心想知道香港未來。Louis說：「風水師會告訴你，他真具備超自然能力，信佢就得；魔術師則會告訴你，只是戲法，最終幫不到忙的。」
這是魔術師的道德，或曰悲哀。