陳靜自闖入電影圈後，跟不少資深演員如杜汶澤、邵音音等合作，今次在電影《BABY復仇記》中，她更有機會與余安安和寶珮如（Baby姐）等前輩合作，DaDa感激寶珮如入戲忘我演出：「Baby姐喺戲中係我讀書時校長，嗰場戲係我一個鎖匙解我心結，我喊到太癲鼻涕都流晒出嚟，但佢真係幫我抹鼻涕，佢一路做戲、一路幫我抹，我覺得好感動。」
飾演大肚婆的DaDa除了增肥20磅，戲中照超聲波一幕更用真肚兼素顏演出，陸以心更對其中一幕DaDa跟Kevin在球場鬧交喊戲讚不絕口：「最初佢猛同我講喊唔到，心裏面諗唔緊要，趁球場熄燈前拍最後一次，點知最後一take過拍晒，嗰日係我嘅生日，我已經當咗係佢送咗一份好好嘅禮物。」