今次區議會選舉好多素人參選，當中喺觀塘月華區當選嘅梁凱晴就獲好多網民追捧，當正佢係女神。佢上月喺觀塘擺街站時仲俾不知名人士襲擊，導致後腦受傷，但佢堅決唔退選，今次當選可謂有回報。
日網民讚可愛
原來唔只香港人欣賞佢，佢仲忽然受到日本網民關注，有網民形容佢係「港版綾瀨遙」，但似乎錯咗重點喎！
點解梁凱晴忽然受日本網民追捧？原來前日區議會選舉期間，有日本電視台到場採訪，拍低佢拉票活動，其實節目係講有後生女挑戰中共支持嘅建制派候選人，不過有關片段播出之後，竟然惹嚟唔少日本網民熱議，好多人話梁凱晴外貌甜美，又話佢身材出眾，紛紛以可愛呀、靚女呀嚟形容佢，甚至有人話佢係「港版綾瀨遙」！雖然梁凱晴同綾瀨遙睇落又真係有幾分相似，但相信佢會想人關心地區工作多過外貌。