反送中運動入面，連登討論區網民一直扮演積極動員嘅角色，所以每次有大規模社會運動，連登都會俾人攻擊，好似8.31遊行當日，連登受到總共超過15億次網絡攻擊；噚日區議會選舉，有網民發現由清早開始，連登已不時上唔到，懷疑又再俾大陸發動網絡攻擊。
有網民發現由清早開始，連登已不時死機，估九成九又俾大陸用DDOS攻擊，不過似乎連登今次早有準備，好快已要使用者選唔係機器登入，先畀你入連登，應該阻止好多殭屍網絡嘅DDOS攻擊，所以噚日連登全日冇down機，只係好慢或間中上唔到，有連登仔喺站務台出貼，話區選都咁俾人DDOS攻擊，出年立法會選舉嘅DDOS一定畀今次仲勁，希望連登admin做好啲準備，以免到時俾人攻擊到全面down機，不過又有連登仔話，要全面擋晒所有DDOS攻擊唔易，今次唔會好似8.31當日咁完全上唔到，其實已做得好好。