左丁山素來主張講政治，對事不對人，上街示威要和平，不要破壞街上設施及建築物，巴黎青年示威之時，幾乎次次都有燒車事件發生，香港青年人係唔應該學習嘅。但6月至今，特別係721元朗，831太子站之後，示威者情緒受到大刺激，對中資公司及藍絲人物嘅店舖，不停破壞，堵塞交通，其實亦連累自己，破壞車站（例如大學站）令到邊啲人最唔方便？應該係到中大返工嘅教職員與學生囉。近代史上最有效之示威遊行，為廣大民眾爭取到最佳利益或突破嘅，就係甘地，及向甘地學習嘅馬丁路德金，兩人成功爭取印度獨立及美國民權法，都冇使用暴力，全靠和平靜坐及遊行。
不過同一位年輕中大校友講呢種道理，佢嘅答案係OK Boomer。之後佢再講：「你睇林行止都有講到列寧國家啦，列寧國家即係專權獨裁一言堂，不容許反對聲音嘅國家。甘地嘅對手係英國，馬丁路德金嘅對手係美國國會及白宮，英國與美國都係民選民主，可以講道理㗎！」
估唔到現在又有人提起列寧國家。想當年，讀書時代認識在亞皆老街珠海書院門外靜坐示威嘅吳仲賢，珠海當年係大右派專上學院，與國民黨關係密切（想不到今日已經染紅，由海航集團控制），吳仲賢係大左派，言必馬列，在珠海讀書，梗係火星撞地球啦！嗰陣時，三聯書局經銷大量馬克思主義嘅書本，吳仲賢叫左丁山試讀列寧之《國家與革命》，適逢文革年間，左丁山學人讀列寧著作，見到一句「名言」，就不寒而慄，不再讀下去，「名言」就係：「每人都有言論自由，寫文得，講又得，全無限制……但如果咁樣，黨最後就會破裂，首先在意識形態方面，跟住在實體方面破裂。如果黨唔及時清洗那些反黨言論、反黨分子嘅話！」試問100年來，由列寧到毛澤東，由毛澤東至21世紀習近平，列寧之言仍然係共產黨之金科玉律，北京黨中央不准黨員或人民「妄議中央」，就係源於列寧呢句金句。但引伸至今日香港環境，明白列寧金句又如何，香港高等法院裁決禁蒙面法違憲，立即被人大常委法工委斥責，又有譚惠珠大律師幫腔，一於大石砸死蟹，睇嚟人大釋法無可避免！苟如是，香港局面還是難以平靜。唔怪得馮睎乾等警示，2020庚子年，二黑入南，二黑係凶星，主有疾病及意外之災，香港在中國南方，中到正，都幾弊，希望係迷信之言啦。之不過，庚子年初五假期完畢，開工之日（即1月29日）遇正破日，又係煩。