在這個烽火的歲月裏，區議會選舉在某些人心目中可能微不足道。不過，有曾經為香港流血流汗的前線抗爭者就認為，勇武與投票從來不是互相排斥，不用二選一。投票是港人對政治現況的民意反映，「去話畀佢哋知，其實你建制獨霸咗咁多年，香港人根本就唔妥你哋！」
既然你都出嚟又食催淚彈又盛，投票日早啲起身，去票站拎張身份證投票一啲都唔難。
「難得有張票喺手，冇理由唔做㗎！」阿強和阿貓（化名），數個月內均屬前線，勇武過也受傷過。做開「大茶飯」的他們，其實不太抗拒在區選投票，不過兩人強調，即使沒有反送中運動，港人亦已經應該投票，「唔係因為我哋幫咗你做啲乜嘢，所以先要去做，而係因為我覺得作為一個有良心嘅香港人，嗰日去投個票係好正常」，阿強說。阿貓亦認同，「至少比所謂政府知道香港人嘅民意究竟喺邊一邊，而唔係佢地成日所謂口講嘅沉默的一群」。
在抗爭的氛圍下，士氣亦相當重要，區議會選舉結果，也是其中一個指標。阿強直言，「作為一個香港人，唔太希望建制派大勝」，阿貓亦指，「起碼呢一票令大家意識到，大家仲會對香港有希望」。相比前線在街頭巷尾上陣，議員就絕對是「和理非」，在現時「以武制暴」的聲浪裏，議會制度還有用嗎？阿貓答得直接，「左膠都有左膠嘅用處！」認為在司法覆核上及法理上等項目，議員及政黨角色亦幫助不少。
「你又唔可以話區議會細到係唔值得你投票」，阿貓認為立法會至少有五個議席是與區議會有關，「其實今次區議會係類似一個前瞻咁樣」。她續指，反送中運動由6月延續至今，不論和理非及勇武，也是本着「愛香港」信念而走上街頭，「既然你都出到嚟，又食催淚彈又盛，（投票日）早啲起身，去票站拎張身份證投票一啲都唔難」。阿貓認為，當100萬、200萬人遊行，建制派仍會以「沉默大多數」反擊，那麼全港市民都在選票上蓋一個印，踢走建制派，就是絕佳的民意證明。
「和勇合一」，向來都是反送中運動特色。阿貓和阿強亦深感認同，認為不止和理非，勇武前線亦應該珍惜手上一票。「我係勇武嘅同時，都可以係和理非」，意思就是，「晨早去投完票，之後再去打過囉！」阿強亦笑言：「平時都有啲和你lunch和你盛，咁咪和你投囉係咪？𠵱家呢件事已經燒到埋身，如果你基本嘅表態、所謂投票都唔去做，我覺得你哋比所謂嘅藍絲更唔值得喺香港存在。」
■記者周詠雯