邵音音在家中小偏廳的麻雀枱上補妝，塗上鮮紅色唇膏，說着剛從美國洛杉磯和佛山回來，一美一中，都是去攞獎。
她主演的短片《老奶奶與無名子》在美國格倫代爾國際電影節（Glendale International Film Festival）大贏三獎，音音姐親身飛到當地領短片組別的最佳女主角。
一頭標誌性的銀髮已經懾人，補完妝點起一根煙，即場示範一瞪眉一個眼神再回望，「就係嗰個眼神囉，你明唔明？即係不停想搵返阿媽係邊個，點知佢阿媽行過佢身邊，佢又唔知嗰個係佢阿媽……所以我轉個頭睇！」渾身是戲的邵音音說：「嗰個表情係好多人（睇到）流眼淚㗎！」
邵音音的人生劇本，本身就曲折離奇得令她留下眼淚前。銀髮宮女話當年，說起被騙拍脫戲、一句「中國娃娃」被視為間諜而遭台灣封殺、有老公等如冇老公的日子……
永遠出乎意料之外，又合乎情理之中，是邵音音的命。
撰文：文嘉龍
攝影：沈健程
冥冥中嘅命運係咁
邵音音說，人老了，明年已是七十之齡，近年只要從外地返港，她要花兩個月才能適應時差。今次憑短片參展獲得人生第一個最佳女主角，她說：「以前平常心係安慰人，當你有得失嘅時候係冇平常心㗎，但係我今次去係好平常心，攞到（獎）之後，我覺得我係好彩到不得了，係命運嘅安排，個天畀個大獎我，而唔係覺得我贏咗嗰班人（共八個入圍者）囉！」
命運安排，邵音音以前不相信的。「人係有命運。郭南宏（七十年代台灣武俠片導演）講過，因為佢好識紫微斗數，我問佢係咪人生出嚟，三歲定八十呀？佢話人一離開咗母胎，一打佢籮柚、個肺一開，呼吸第一啖氣，已經係注定佢嘅命運！我即刻話，嘩，你紫微斗數咁叻、星相學咁叻、易經咁叻，你咁迷信嘅！但係我越嚟越老，發覺原來真係人呼吸嘅第一啖氣已經係注定咗，你點樣去plan你嘅將來，原來冥冥中你嘅命運都係咁，你改變唔到㗎！」
邵音音本名倪小雁，出生香港，父親為國民黨成員，小時候的邵音音隨父親坐軍眷船避居台灣。她在台灣修畢護士課程，到輪船公司當上商船護士，1972年船隻在香港靠岸，正待登上董浩雲（董建華父親）的「海上學府」郵輪，竟發生離奇大火，冥冥中似是安排了邵音音另一條路。
「我係上一隻世界上第一隻喺海上面嘅宇宙學府（「海上學府」），係董浩雲嘅，即係董建華阿爸，點知無端端突然之間火燭，我哋咪冇得上船囉！冇嘢做停咗喺香港等其他船，等金山輪船公司再派邊隻船嚟，你先有得上。嗰陣時喺香港等，我咪搵番我讀護士學校啲同學，我同學嘅爸爸媽媽喺嘉禾（電影公司）做繙譯，我咪去探佢，嘉禾啲門一日到黑鎖住，唔係點可以入去呀！佢哋住嘉禾宿舍，喺台灣新竹過嚟，帶我去睇李小龍拍戲，李小龍就同鄒文懷講呢個女仔幾好，你叫佢去試鏡啦！」
被李小龍睇中，邵音音率先和另一位有份試鏡的女仔在《龍爭虎鬥》內當茄喱啡，之後以為機會來了，事緣另一電影的女主角適逢被嘉禾揸弗人鄒文懷睇中，以高出女主角多倍人工另請她當製片，於是女主角懸空，李小龍遂提議由邵音音頂上。滿心歡喜以為有女一做，結果被這位飛上枝頭的製片當場鬧走。
做人永遠逃避唔得㗎
那位得寵的女製片，當住眾人面前，叫幕後人員除下邵音音的戲服，趕她離開片場。「佢巴閉吖嘛，我就喊到不得了，我憎到嗰啲人死呀，即係憎電影（圈）嗰啲人，第一冇禮貌，第二又唔知邊個叫我換衫叫我拍戲又斟茶遞水畀凳我坐，𠵱家又突然之間唔知乜嘢女人，又可以趕我走！我咪喊住走囉，點知個副導演呢，張鵬（Chaplin Chang）佢就介紹我畀張徹（導演），我為咗一啖氣就走去試鏡，我唔信我唔得，點知我試鏡就同戚冠軍啦、葉天行啦、鄭則仕啦、梁家仁啦，同一批入咗長弓電影公司！」
算是正式踩隻腳入電影圈了。之後邵音音拍了吳思遠的《13號凶宅》被騙出浴變露點，自此被人標籤為脫星；1976年得李翰祥推薦主演風月片《官人我要》，到康城參展以粉紅肚兜透視裝現身，被美聯社稱她為「China Doll」，譯稿寫她是「中國娃娃」而觸動台灣神經，視她為大陸間諜，列入封殺黑名單。前半生的這兩大「污點」令邵音音大受打擊。
「嘈就梗係唔敢嘈啦，你唔知去邊個部門講喎，話你係黑就黑㗎喇，呢啲係咪命運呀？嗰陣時唔敢咁講，委屈㗎，同乜嘢人講呀？你喊都喊唔切，你係一個俾世界拋棄嘅一個人喎！」再遇吳思遠，很尷尬？「冇嘢，我叫佢、佢又笑笑口，係佢兩公婆唔肯見我咋嘛，佢哋覺得我蠢咋嘛，邊度會內疚啫！冇㗎，嗰啲人，佔人便宜嗰啲人係唔會覺得自己錯㗎，佢覺得你蠢啫，佢哋覺得自己叻，不過佢哋覺得唔好彩囉，踩你唔死，畀你有機會講囉，我認為係咁！」
電影圈容不下邵音音，她為生計到馬來西亞登台，認識了當地富商華僑陳耀發，交往兩年後於1984年結婚，婚後誕下一女一仔，邵音音其後移居砂勞越再到美國三藩市，90年代才搬回香港。有了家庭，以為人生從此美滿？
「我自己諗啫，我嘅願望就係有男人要我，我可以組織一個家庭，我可以生仔女，就係咁簡單，原來你掛住『邵音音』呢個秤砣呢，係唔會畀你有咁嘅生活㗎，你嘅仔女返學，啲同學阿媽會話畀啲仔女聽，佢阿媽剝衫㗎，即係變相我又要去輔導佢哋，要睇得起自己囉，我過得唔快樂，我放棄自己嘅生命，就係因為有人睇唔起我，我更加睇唔起自己，所以永遠都匿埋喺一個黑暗嘅地方，咁樣做人係永遠逃避，唔得㗎，原來要面對嘅！」
可幸一對仔女與她感情好好，「好彩佢哋好愛我，但係佢哋會返嚟喊囉，喊得好慘。我覺得我以前匿埋，我唔想佢哋都匿埋，所以我就叫我個仔，你問你嘅同學，話我阿媽叫我話畀你阿媽聽，佢以前拍過脫戲嘅，我阿媽想見你阿媽，佢想問你想點呀！（之後個同學）佢哋轉學校喇！（驚咗你？）唔係驚，好嘅諗，就係嗰個阿媽有少少慚愧囉，唔好嘅諗，就係驚惹事囉！佢開心講畀佢啲仔女聽，係好過癮，因為佢覺得踩到我，佢高過我吖嘛，咁我都要保護我啲仔女！」
我生出嚟就忍到𠵱家
與一對仔女無所不談，說到老公，邵音音欲言又止。「唔知呢，我慣咗大家啲生活習慣唔同，唔想邊個改變邊個，因為我諗嘢好簡單，我就係要一個好簡單嘅生活，但係當我哋建立到一個家庭嘅時候，發覺大家嘅生活方式唔同，唔想邊個改變邊個啦，大家有大家嘅生活囉！」
有說邵音音的老公與另一個大陸女人返回馬來西亞生活。問音音姐，現在老公人在馬來西亞？「咪頭先嗰個囉（指客廳方向），佢咪走嚟問我，工人經過呢度可唔可以呀，我話得，咪就係咁囉！即係可能幾個月先至有一句咁嘅溝通囉！（大陸女人呢？）唉，日日都有，𠵱家都有，一路都有！」不欲多言正準備行入客廳的音音姐，邊行邊又忍不住說：「𠵱家最衰就係嗰啲女人識中文，佢（老公）唔識中文，啲女人將啲中文譯畀佢睇，佢就返嚟鬧我，嗰啲女人又好開心喇，見我哋鬧交！所以唔好講佢呀，佢有佢嘅生活，佢有佢自己鍾意囉！」
隻眼開隻眼閉？「我唔係，我隻眼唔使閉嘅！佢係佢，我係我，冇相干。唔好彩囉，揀嘅唔係自己想像要嘅，就係咁囉！」同一屋簷下，當老來一個伴？「佢又唔係我個伴呀，佢點會係我個伴呢？我點會要個咁嘅伴，咁大家住一間屋吖嘛！」開心嗎？「點會開心吖，一個唔啱自己嘅人喺身邊點會開心？咪當佢死嘅咪得囉，冇辦法㗎！」要好忍得？「我生出嚟就忍到𠵱家㗎啦，我條命都係要忍！」
邵音音條命，要到2008年憑《野．良犬》獲金像獎最佳女配角；2011年再以《打擂台》拿下第二座女配角獎才真正獲別人肯定。她大半生漂泊台灣、砂勞越、美國再回流香港，居住在三藩市的九十歲母親，常常叫她回美國一起生活。「我以前最憎香港，因為覺得所有人都睇唔起我，見到我都可以喺路邊吐痰喺我個身度呀，因為我係黑名單吖嘛！唱歌我帶咗好多戒指，你知戒指握手好痛，佢哋特登攞啲玫瑰畀我拎，啲刺拮到我流血呀，殘忍囉！」
當時只想盡快離開傷心地，「去一個冇朋友冇人識嘅地方，點知原來你去到個地方，只要有華人，你就係邵音音，啲人都係一樣。砂勞越更加落後，啲人就更加單純，但佢哋講啲說話嚟毒你，咁就更加殘忍！諗住去到美國係一個先進嘅地方，唐人街全部都係唐人，原來嗰啲人又係睇唔起你，對你有興趣係因為你係娛樂界，好想知道娛樂界啲衰嘢，邊個同邊個通姦，邊個走私邊個離婚呀，佢哋要喺你身上知道人哋嘅唔好，最好你講得越衰越好，嘲笑電影界呀，原來阿邊個有錢係咁賤，佢哋開心到不得了……」
此地不留人，自有留人處。「我覺得香港都係我自己嘅根。𠵱家香港咁亂，我阿媽就好驚，你快啲返番嚟美國啦，我話我走咗一世喇，我都就嚟七十，我走得去邊吖！我𠵱家信命運，呢度係我屋企。」
【後記】Bon仔
音音姐四年前搬到林村，由二萬多呎的加多利山獨立屋，到三千呎的又一村豪宅，再到二千呎的村屋，她說最愛現在的家。家前花園有檸檬樹、木瓜樹、藍莓樹……只是村屋的屋號難找，記者和攝影師尋了多圈才找到音音姐的門號。
訪問期間有很多「特別嘉賓」，如落樓準備外出的是音音姐女兒和女婿，音音姐的女婿是日本音樂人波多野裕介，原本不太願出鏡的女兒最終也肯合照。音音姐對女婿很滿意，「之前《七月與安生》咪係佢配樂囉，攞咗金像獎㗎！」女婿靦腆而笑。
還有家中的十貓三狗，通屋跑很可愛的松鼠狗，音音姐叫牠「邦仔邦仔」，問她點解叫「邦仔」？音音姐說：「係Bon，法文，好咁解！」
