警察與示威學生在中文大學校園東面二號橋對峙，氣氛在11月14日好緊張，謠言滿天飛，講到11月15日警察會強攻，令校友擔心。點知就在11月15日凌晨三時，校內黑衣人三位（後來知道並非中大學生）召開記者招待會，宣佈願意暫不堵塞吐露港公路，願意開放南北行各一條行車線，之後經過一啲轉折，非中大學生於11月15日全部撤離中大校園，校園回歸平靜，等候清理。
11月15日凌晨中大校園內發生了甚麼戲劇性變化，左丁山未能完全掌握，只知道新亞校董鄭承隆突然現身於校園內（不知是甚麼原因，後來他亦與曾鈺成及張達明進入理大。鄭先生本來好低調，社會對他認識不多，連好多新亞校董都不知他是誰，點解呢次咁主動介入呢？傳媒不妨搵佢作深入訪問。）鄭承隆未現身之前，有三位中大校友已經同黑衣人前線（二號橋）及後勤商議「退守」，過程曲折，將近有結果之際，鄭承隆出現，黑衣人對鄭有疑慮，於是又花多三四十分鐘釋疑，鄭親自走到二號橋向前線游說，卒之發生咗凌晨三時記者會，事情方有轉機，這三位校友中，兩位新亞、一位逸夫，能夠冒險犯難，親入「虎穴」為中大拆彈，製造咗一個比較和緩嘅環境，讓段校長發表公開信「送客」，於是水到渠成，非中大示威學生於11月15日日間盡數撤走。
傳說勇武黑衣人離開中大，部份原因係為咗增援理大，與警察在理工校園外決戰，17、18、19日三日紅磡及油尖旺區衝突不斷，驚心動魄，可能係今年逆權運動之最高潮，經此一役，黑衣勇武派唔守住Be Water原則，四處流竄嘅毛澤東游擊戰方式，反而集中力量與警察在理工大學外大打陣地戰，梗係強弱懸殊輸硬被擒喇！烏合之眾憑血氣方剛對戰久經訓練嘅防暴警察，再加上土製武器對催淚彈、水炮、橡膠子彈，邊有得砌？左丁山估計經此一役，勇武衝突將暫告一段落，示威者抗爭會改為分區式騷擾，最終解決方法還需政治方案，而且提升到習近平特朗普水平，非一位讀書考第一嘅女士可以話事。目前最重要嘅就係今日第一件事，出門就去票站投票選區議員，vote the rascals out，一於票債票償。至於投票投給誰，左丁山對區議員一向冇乜認識，曾向一位研究過投票策略嘅朋友問路，佢講得好簡單：「嗱，對你地呢班不大認識候選人嘅選民嚟講，最簡單方法就係買張愛國報紙睇吓，呢兩張報紙吹捧邊位，你就投票畀佢地嘅對手！」但係如果對手唔止一個，咁又點？朋友話：「唉吔，你起碼睇吓候選人寄嘅宣傳單張先啦！」