【本報訊】由掛住讀書考牌到埋首創業，一場反送中運動，改變了龍門冰室老闆兼創辦人張俊傑，成為他成年後，公民教育的最佳啟蒙老師。區選在即，他直言悔恨錯過登記成為選民的機會，呼籲已登記的選民，明日記緊代他為香港發聲，投上神聖一票：「大家都見識過𠵱家好多議員，有人講人話，有人不知如何形容講咩話，大家就用自己嘅選票，去選一個用良心去做嘢嘅人，幫你去發聲。」
「香港𠵱家唔正常」
有人說龍門冰室因為張俊傑越走越前、被標籤為深黃店，他大感無奈，只是做應做的事。「不關龍門事，係我個人政治傾向，政府推送中條例，專業人士話不可行， 一百萬人遊行政府唔理，二百萬又唔理，唔係一班不顧自己前途嘅學生去阻止呢件事，我哋已行緊大陸法，所以我係好感激佢哋」。
過去和大部份港人一樣日出而作，阿傑苦笑謂是一場逆權運動，讓他再次關心社會。「香港𠵱家係好唔正常，就如黃子華所言，董伯伯係好特首，佢無能力為香港做好多事，至少𠵱家公廁有廁紙都係佢嘅功勞；曾蔭權由英國培植出嚟，無為而治；之後兩個特首就用金錢蒙蔽你，講大陸畀咗啲咩利益香港，有自由行香港經濟先會好，但大陸有難係邊個幫？當年水災，香港人做咗好多嘢都無提，𠵱家吓吓講東江水講大陸食材。」
和港人一樣一肚怨氣，他越說越激動：「最需要人幫時，幫你嘅就係恩人，𠵱家調轉頭嚟講，我學識咩叫忘本；仲有玻璃心，某個藝人戴口罩影張相，頭髮遮眼就話人哋支持反送中，要抵制佢，係邊個搞到咁政治化？大家爭取嘅只係應有嘅自由。」
只是，今日香港，公開表態禍福難料，阿傑說擔心一定有，只能見招拆招。「每日朝早接到電話，好怕聽到邊間鋪頭又俾人扑爛晒；我阿媽亦好擔心我人身安全，成日問我喺邊，叫我唔好留喺街，唔好一個人，但驚都無辦法，我只係做茶餐廳，咁樣都有人睇唔過眼，人哋大企業，誠哥做嘅嘢肯定多過我，我只係資助學生食嘢、幫有需要嘅人食乾糧，我覺得我做嘅係能力範圍內嘅小事，誠哥幾億幾億咁拎出嚟咪仲偉大」。
他反問：「點解要針對我呢啲小市民小企業，然後走出嚟攻擊我？」區選在即，未及登記做選民，阿傑直言很後悔：「我由細到大都無申請做選民，所以咁多年區選都未投過票，不過早幾日有人聯絡我，佢話你有幾間餐廳可以有票，問我會唔會登記做功能組別（飲食業）嘅選民，我立即答應咗，盡自己公民責任，希望揀一個真正代表到行業有良心嘅議員」。
他呼籲已登記做選民的朋友，記緊投票，留我青山在，盼勇武派保持克制：「大家都見識過𠵱家好多議員，有人講人話有人不知如何形容講咩話，大家就用自己嘅選票，去選一個用良心去做嘢嘅人，幫你去發聲」。推而廣之，若可一人一票選特首，他說亦未必有今日的局面。「基本法講咗會有，只係延遲仲變小圈子選舉，如真係有票，就未必可以咁樣通過蒙面法，第二啲國家，總統民選出嚟，但我哋嘅特首就只係用權力硬推，叫人如何心服？」由不問選舉到認真探究討論神聖一票到底有多神聖，一場運動，有破壞但也肯定有建設，激起的，何止千重浪？
■記者呂麗嬋