前日連登出現一篇〈 [江湖傳聞] 政府高層發生激烈打鬥〉，指張建宗接受國際媒體訪問時爆料，鄧炳強被官員圍毆，站在一旁的鄭若驊拍手叫好，不停大喊：「給我打，把他往死裏打！」文章又指林鄭用木棍暴打鄭若驊，鄧炳強亦用警棍把鄭若驊打至脫臼。
儘管多數網民都知道這是改編自流傳多年的〈荷蘭三棍客潮文〉，但內容實在太惹笑，所以都忍不住按like狂推。意想不到的是，政務司司長辦公室竟然認真看待這篇潮文，即日在Facebook澄清：「今日有網上傳聞引述司長話政府高層發生打鬥，有關內容完全捏造，非常無聊。」
司長，我留意咗你好耐，你真係好幽默。我自問都算個OK幽默嘅人，但係你幽默感比我真係高十幾二十倍。錯，應該係100倍先啱，估唔到我喺呢個post竟然見識到你嘅威力。我真係笑到爆咗肚，依家一路打字一路撿返啲腸呀內臟呀腎呀，塞返落個肚度。陳奕迅取消咗演唱會，你有冇諗過下個月去紅館開棟篤笑？
就在司長發聲明後一小時，我的藍絲群組忽然傳來一篇「政府消息人士」文章，原來是高官激戰的後續，原文如下：
「鄧炳強突然使出一招打狗棒，向住鄭若驊心口大大力錫落去，唔係，係扑落去，呢鑊真攞命呀。鄭若驊不慌不忙，由得隻脫臼嘅手吊吊揈，雙胸則渾圓成盾，使出乾坤大挪移，將打狗棒威力化解於無形。鄭若驊連消帶打，大喝一聲，霎時之間，辦公室鬼影重重，成個場都係鄭若驊嘅身影。只見鄧炳強眉頭一皺，計上心頭，左腳踏地，大叫一聲『忠誠勇毅，皆陣列在前』，原來佢標起童上嚟喎。
「鄧炳強嬌喘一聲，倒在鄭若驊嘅懷裏，喺呢個時候，鄧炳強眼如微絲，濕潤嘅雙唇，微微張開，口中噴出有如蘭花一樣嘅香氣，對住如斯尤物，林鄭都會動心啦……」
之後內容太重口味，我不引述了，你是藍絲，自然就會看到。我覺得現在社會真的充滿怨氣，我相對處於一個比較體諒的角色，有時打開報紙，見到有人好激烈地反對黑警，或者從早到晚叫特首下台，我反而覺得：「嘩！使唔使呀？由得佢哋攬炒咪仲好！」今天，我其實只想跟張建宗說句加油！
講真，政務司司長話大唔大話細唔細，我建議你走上街頭，政府已經冇咩發展空間喇。你先去買張八達通，用48小時同我學識點樣用，第二朝黎明時分，搭頭班巴士落旺角，唔好搭黨鐵，行去信和門口，舉起五隻手指，大叫：「五大訴求，缺一不可！光復香港──」然後你睇吓附近有冇學生，打個眼色畀佢，佢就會答你：「時代革命！」
你一路大叫一路行去龍門食早餐，這時全港所有記者，包括外媒，都會聞風而來。你食完早餐，放低張金牛話唔使找，龍門老闆會追出來話唔收得，你就大大聲答佢：「唔收得？咁唔該你同我捐咗佢！總之唔捐MSF就得嘞！」你一講完，現場掌聲雷動，全港看直播的人，有一半都掉下眼淚。
然後你帶着一群黑衣人，喊着口號，浩浩蕩蕩步行到紅隧，沿途市民不斷歡呼：「張建宗，加油！」你坐在紅隧口，鄧炳強會帶速龍把你包圍，聲稱你被曱甴脅持，你咬着一條生命麵包，淡然向着「PK721」的方向叫一聲：「721！」群眾就和應：「唔見人！」防暴準備射催淚彈，你叫：「黑警放TG！」其他人就會接：「警嫂生ET！」
等到日落，曾鈺成會奉命來「營救」你，這時你大叫：「票投民建聯！」全香港有至少二百萬人會馬上接：「摧毀你家園！」你把握時機，向前線警呼籲：「唔係黑警嘅，同我將槍口指住香港人嘅敵人！我保證你無事！」然後大量警察會倒戈，鄧炳強就用凌波微步趁亂逃去。
最後一步，就係等，等咩嘢？等林鄭抑鬱發作，中央批准佢辭職。去到呢步，唔使再講啦……