11月17日沙田賽馬，如期舉行，雖然入場人數為了眾所周知的理由，創20年新低，但左丁山常去嘅廂房，所有常客到齊（即是有Seasonal table嘅會員，每個馬季嘅出席率接近100%），要打電話訂枱嘅生客，就比較少見。所謂生客，即是久唔久到馬場嗰種，忽然間對入馬場有興趣，每與朋友夾啱時間就可以訂枱。左丁山在每一個賽馬日都見到不同生客組合，有啲係老馬迷，有啲係講英文多過講廣東話嘅年青一族，更多見嘅就係男女混雜，年紀在六十幾歲以上嘅組合。
本來賽馬係大眾玩意，見解各自不同，馬場常客唔應該對生客有like或dislike，但老實講，每次賽馬，當啲長枱常客聚精會神刨馬，低聲講馬之時，啲生客唔知點解，總有不少人大聲講東講西，大罵曱甴有之，大講雪梨溫哥華生活有之，大講娛樂八卦及麻將經有之，就淨係唔講馬，我哋啲常客，畀佢哋煩得要死。其實到馬場廂房食飯跑馬，有最低消費，不算便宜，做乜鬼你要在賽馬日到馬場詳談啲日常生活瑣事及政治評論而唔投注？講呢啲嘢，去美心集團食肆講餐飽啦，走嚟馬場做乜。或者走去福臨門開間房打麻將，暢所欲言，豈不更好？啲太太團成日講麻將，做乜唔留在家裏打番八圈、十二圈而走嚟馬場嘈幾個小時？
新馬季自9月開始後，有不少Boomer散客，不斷講示威人士破壞香港，跟住講吓溫哥華、多倫多生活，隔幾場先至去窗口落注，馬會多得佢地唔少──霸住張枱而唔落注，影響馬會收入也，前星期卒之聽見有人話頂唔順啲曱甴搞亂香江，決定再回流加拿大，返番多倫多。一位常客聽到，細細聲話：「好行夾唔送。」做回流加拿大人或澳洲人真好，既享受加拿大民主自由，拿加拿大護照，又可以回到香港過番懷舊生活，故此呢類人普遍討厭冇外國護照嘅香港人為爭取民主自由而上街，指斥示威破壞香港繁榮安定，更有甚者，可能佢哋三十幾年前移民，在彼邦受過歧視，所以現在對祖國強大起來了，感到無限歡欣、光榮，在馬場廂房唔投注，而以大罵美國為樂。實質佢地對世界政治及中國面貌之認識有幾多？飲過洋水，從加拿大回來就大罵美國假民主，中國有大進步，故此受西方打壓，諸如此類。左丁山見呢類人見得多，不以為奇，但只希望馬會下季能夠將廂房之常客、生客分開，常客坐在廂房之北，生客坐在廂房之南，於是之北寧靜，常客可以專心投注，之南嘈吵，噴口水，各適其適，不亦樂乎！