蔡少芬（Ada）上周五第三度做媽媽，追仔成功，為老公張晉誕下大隻仔張樂兒。張晉昨日在微博貼了一段約六分鐘的短片，分享老婆生仔過程，片段一開始，素顏的Ada站在廁所門口說︰「我要沖涼喇，一個月後先有得沖涼，好淒涼。」好友陳法蓉則興奮地說︰「生BB，生BB。」Ada沖完涼後就穿上手術服，張晉貼心為她吹頭。
鏡頭一轉，Ada已準備入產房，她說︰「最後一胎，唔會再生。」張晉坦言︰「我有啲緊張，陣間會唔會我暈低，姑娘要救我。」之後片段有一把BB的喊聲，然後看到已出生的樂兒和父母合照，亦有張晉剪臍帶相。Ada說︰「生到塊面爆瘡，之前冇㗎！」返回病房後，Ada已掛着兒子：「我唔想佢哋攞走我個仔。」張晉則說︰「男人不要跟女人爭，爸爸偉大還是媽媽偉大，肯定是媽媽偉大。」
撰文：翁可人
