林二汶明年入行20年，過去她曾表示為了堅持創作夢要身兼多職，但二汶涉足的工作，基本上都是她喜歡及有興趣的。除了音樂，二汶最愛錄V.O.（旁白）︰「因為快靚正，係好好嘅練習，過程會學到唱歌，好多時15秒要講70隻字，咁多information，點樣字正腔圓將啲嘢吐出嚟而唔覺得突兀，係好多工夫，呢種練習對唱歌好有幫助。」
說到明年的計劃，二汶坦言希望開紅館騷，但紅館要一年前申請，換言之即使現在申請成功，也要明年年底才能開。她說：「認真講，係想幫一啲年輕、想有作為嘅製作人，都要承認出大碟呢個模式已經唔係最時髦，𠵱家聽歌聽單曲或榜，但係音樂依然被需要，我希望同新嘅音樂人合作，有啲嘢佢識我唔識，有啲我識佢唔識，大家可以交流，我唔想變成脫節嘅上一代歌手，希望與時並進。」