【地產專題】四年前《蘋果》幫何太驗收660萬元鴨脷洲新盤，如今何家喜獲麟兒，在父母資助下，自嘲「低等中產」的何氏夫婦花逾100萬元積蓄，再買入成交價達800萬元的元朗PARK YOHO Napoli特色戶。
四年買兩層樓有何心得？何生笑言：「瑞士卷分兩日食，哈哈！咁同劉生（劉鳴煒）講去少次旅行有冇分別呢……」收起笑聲，他認真地說，在香港買樓絕不容易，今次除了是靠父幹，兩公婆都一直努力，「每人每年儲15萬元，算唔算多？盡力囉，慳啲，做吓兼職，每日瞓少兩個鐘，夜啲收工囉。」
何氏夫婦分別從事教育界及銀行界，2015年何太以個人名義用約660萬元買入一個鴨脷洲新盤，當時已支付超過100萬元首期。四年後，高幾層的同座同面積單位以780萬元沽出，保守估計單位升值約15%。
今年6月，何生用自己名義以約800萬元買入元朗PARK YOHO Napoli兩房特色戶連平台，由父母資助約200萬元，加上兩人四年來儲蓄的100多萬元做首期，「因為BB出世，想有個大少少地方畀BB郁吓。嗰個（鴨脷洲單位）係一房，現時有BB又有工人，住唔到」。他們認為元朗新樓面積較大、空氣較好，且被新樓會所吸引，可讓小朋友嬉戲。他稱：「衡量過唔同地方，呢度啱心水啲，出元朗市中心駁一程小巴，當自己住西貢或村屋，接受到嘅。不過呢度多蚊囉，可能要落蚊帳。」
Napoli驗樓評分高
他在6月上旬簽訂臨約，記者10月中接觸他時，他曾表示憂心忡忡，因為拍板買多一層樓後，就是6.12、7.21、8.31……無數港人無法忘記的日子，「睇到呢幾個月，啲樓價沉一沉，個心都沉一沉，自己都有出來遊行，相信香港人會過得到，沙士都過到，我哋好多嘢都過得到。我再諗，沉，都係一下，自住唔使諗咁多。」
手執兩層樓，目前有不同未來方案，「一房（鴨脷洲單位）可能會賣，減一減磅，唔關政局事，供到都吃力。同埋呢度係偏遠少少，可能住一段時間，想出返去市區，到時睇吓點變動資產，例如賣咗件一房，唔排除換入一個平平地、無會所嘅兩房二手樓」。
何生說，購入單位時，發展商包全屋傢俬，如果不要則會在樓價回贈1萬元，結果他選擇要傢俬。驗收單位的詹濟南「詹Sir」話被衣櫃或睡床遮擋的牆身或地板，如果出現空鼓，只要單位或鄰居沒有進行大型室內裝修工程，理應不會令問題惡化。不過如果可以移動，都會稍為移開衣櫃，盡可能檢查牆身有沒有空鼓。詹Sir徒弟康仔幫手驗過，指全屋牆身均沒有空鼓問題。
詹Sir走出平台，指着地磚說：「鋪磚設計有問題，將兩塊地磚水平般編排好睇啲。但一塊前一塊後，令到磚邊出現弱點位，弱點位容易撕裂。如果換件新磚，曬多兩曬，又再裂過。修補好過更換，補最多唔好睇，換完都仲係裂。」
他又指，平台玻璃圍欄下石材撞崩，「石材係可以接受修補，但修補完要好睇啲。點為之好睇，應該離開兩米去睇，唔覺眼，為之收貨，現時呢度太遠都睇到係啦。用雲石膠補係啱，但花崗岩凹凸不平好難補得靚，要花心機。」
單位採用開放式廚房，正是今次扣分最嚴重地方，因為溢水口漏水，滴到櫃底一灘水，令來去水項目捧蛋，連同門及窗少許瑕疵扣分，單位驗樓總分有90分。
記者：陳家雄
