昨天看見一則新聞，覺得很有道理，二話不說，立刻寫了今天專欄的稿，從未試過寫得這樣快。全文如下：
「食物及衞生局局長陳肇始說，政府不會公開催淚彈成分，因為警方指出，這涉及行動部署，公開了會影響他們的行動能力。我覺得很有道理。我也決定不公開今天專欄的內容，因為這涉及寫作部署，公開了會影響我的寫作能力。」
本來今天的專欄就這樣完了，但人算不如天算……
電郵給編輯小姐時，戰戰兢兢問句：「咁交稿得唔得？」編輯答道：「得，仲收三十幾萬一個月㖭──不過你唔係陳肇始囉。」我說：「喺電光火石之間，我靈機一觸，覺得可以咁寫，係不完美，但可接受。」編輯說：「我唔接受！」我解釋：「如果我唔公開今日專欄內容，咁我就可以將今日要寫嘅嘢擺落聽日；如果公開咗，你話係咪影響我聽日嘅專欄部署先？」
編輯說：「你明明唔夠字數，咁寫法唔啱規矩。」我說：「我日日都要出文，你冇理由要求我每篇文都完美㗎喎。我工作壓力好大，寫少幾隻字好正常箒。」編輯頓一頓，然後說：「我數過，你寫得一百字咋喎，唔係寫少幾隻字，係少咗幾百字呀！」我說：「我唔知你用咩制去數，嗱我同你講，我就用毅進制嘅，冇得輸。」
編輯說：「你打橫嚟講！」我說：「呢個係觀點與角度箒，我就覺得空白位都係字，呢種寫法叫『留白』。我專欄唔寫字，只係為咗畀讀者有一個反思嘅空間。最近香港人咁燥，如果我今日留一片空白喺度，等大家望住佢冥想，係咪對讀者嘅身心靈都有益先？我查過國際文獻，冇證據顯示專欄一定要有字㗎喎。」
編輯說：「好，你既然咁辛苦，我唯有cut你稿，減低你嘅工作壓力喇。」我答道：「我覺得你完全誤會咗我嘅意思……你等等，我補返幾百字畀你。」
由此可見，只要林鄭月娥有編輯小姐一半咁好打，警察就不可能橫行無忌了。當某個人的權力不受制約時，你不可能再跟他講道理。講道理的前提，是實力。