自上周三以來，紅隧一直封閉。運輸署特別提供免費小輪由紅磡及九龍城碼頭來回灣仔，朝七晚七，彈性處理。不知道這段期間喺紅隧出入口兩旁落咗巨型戶外廣告的廣告商，會唔會都有彈性處理，獲得些少額外賠償呢？
例如延長其上畫時間，又或者下次再book的時候可以畀個特別優惠價之類。不然，好似WeLand咁，在紅隧港島入口包起了全部廣告牌，本應既醒神又搶眼，但遇上今次的封閉，搞到門堪羅雀，過百萬的廣告費就如倒錢落海。
近兩三個禮拜，大概應該係好日子的關係，身邊有好多人擺酒結婚。雖然外面烽煙四起，但訂晒場又約晒親戚朋友，改期往往並唔係一個選擇。以前起碼八時半入席，九點先上乳豬，而家七點半就乖乖哋上乳豬，邊上、邊吃、邊聽新郎新娘台上的感人分享，差不多十點就開始散水，仲提供接駁巴士服務，送達港島、九龍及新界多個地點。婚禮，亦變得彈性處理。
有些打工仔因為怕塞車遲到，提早喺繁忙時間前好多就返到公司，於是乎，有些公司老闆就索性將成個上班時間移早。早返工，當然就早放工啦，更有彈性，返工放工都避開晒啲塞車。昨天，聽說有個公關公司職員要從九龍城到觀塘開會，因為觀塘至九龍灣一帶大塞車，佢採取了一條極迂迴但又絕不阻滯的路線，就係搭船。點搭？當然沒有由九龍去九龍的小輪航道啦。先由九龍城碼頭坐船去北角，然後再由北角坐另一隻船過返觀塘。毋須僵持在路面或地下，如此靈活彈性，不得不佩服。
本周五是4As金帆廣告大獎頒獎禮，過去幾十年都係夜晚搞，今年臨時改成午餐頒獎禮，相信也是另一項彈性處理。星期五，還是儘量避免那些入夜後於中環灣仔一帶的大型活動為妙。香港人，加油之餘，仲要馬死落地行。
文迪晞
mailto:[email protected]