現年58歲「黑妹」李翊寧（前名李麗霞）跟梅艷芳一樣，小時候在荔園賣唱，1983年參加第二屆《新秀歌唱比賽》，雖然未能大紅大紫，但能夠有家人、朋友愛錫自己，對黑妹來說已深感滿足。幾個月前黑妹得悉腦瘤是良性，而肺部癌細胞又能及早切除治癒，一切一切讓黑妹感動落淚。
撰文：魯吉
攝影：林賓尼
黑妹日前在上水的1,400呎新居接受《蘋果》專訪，提起患病經歷，黑妹開心說：「我唔係驚cancer，係驚中風，驚個女服侍我、擔心我。醫生幫我check，3月15號話個肺發現咗粒嘢，當時眼淚標出嚟，醫生話腦同肺嗰粒係match嘅話，即係擴散，再入醫院檢查，好開心腦科醫生話唔係，跟住我個女啲眼淚標晒出嚟，所以好感恩，身邊真係好多人錫我。」肺部3cm的腫瘤是惡性，但由發現到手術完成只花半個月。黑妹說：「不幸中大幸，早發現，我覺得自己好幸運。」
《新秀》三甲不入
黑妹年幼喪父，母親獨力照顧她三姊弟，黑妹13歲小學畢業後便輟學到荔園賣唱幫補家計。她說：「我媽咪唱歌，爸爸做音樂，我第一份工開始唱歌到𠵱家，未轉過。其實媽咪唔鍾意我唱歌，但我始終鍾意。」唱荔園、酒樓、夜總會再到酒廊，黑妹1983年參加了第二屆《新秀歌唱比賽》，惟三甲不入︰「初初未識諗好失落，原來比賽完，我返番去酒廊唱，全部嘢upgrade晒，唱一場由百幾蚊去到三百幾！」
當年選完《新秀》後，華星唱片曾邀黑妹簽約卻遭她拒絕，理由是想搵真銀。她說︰「坦白講，當日一出嚟唱歌，都好想係梅艷芳、甄妮，想做superstar。唱緊酒廊時，個心好想錄唱片，就搵唱片公司，佢話：『你都黐線，我晚晚100蚊都聽到你唱歌，使乜買你隻碟？』呢句話似一盆冷水，咁我惟有喺酒廊發揮自己。」
睹劈友驚到震
酒廊品流複雜，遇上惡客如何應付？黑妹笑說：「佢叫你點，你一定要應佢，如果當佢唔存在，佢一定玩嘢，尤其飲大兩杯，有時我唔講嘢，狂唱快歌完結咗，大家鬥嘈！」見慣大場面的黑妹也有驚到腳震經歷：「呂珊同我同場，突然有人笠絲襪揸西瓜刀，好似拍戲咁，斬啲枱客，當時梗係驚啦。」千禧年代黑妹開始做幕後製作，包辦香港、外地登台騷，藝人如羅敏莊、喬寶寶跟她搵食︰「唔好咁講，只係畀個平台大家搵錢，佢哋抵得諗又好錫我。我哋冇簽約，總之有飯開，大家一齊做。」
歷兩段婚姻愛獨居
黑妹曾於白建時道購入豪宅，跟富商劉鑾雄做鄰居，黑妹說：「好多人話黑妹你好有錢，係，我靠唱歌搵過好多好多錢，但我亦使過好多錢。我身邊細佬妹、朋友嚟食飯，我一定食好。」當年女兒跟女婿住白建時道，黑妹住西半山，後來為了讓外孫有更多活動空間，黑妹賣掉港島區豪宅，跟女兒一家搬到新界區。
黑妹與獨生女的生父早已分開，之後在加拿大再婚，最終離婚收場。她說︰「我先生（前夫）對我好好，奈何我貪玩，我係都要返香港。」現時黑妹在上水1,400呎大宅獨居，女兒、女婿和兩個乖孫住附近，她笑說：「一個人舒服好多㗎。」
