早前外訪期間被示威者包圍時，仆倒倫敦街頭嘅律政司司長鄭若驊，講到身體受到嚴重傷害，甚至要留喺英國治療，近日更稱左手腕脫臼骨折，要三個月甚至一年時間先至復元，希望倫敦警方徹查事件，但有網民就發現，被戲稱「骹主」嘅鄭若驊周二喺大使館見記者時，身穿緊身樽領衣，對一名手腕脫骹嘅傷者無疑有一定難度，質疑佢誇大傷勢。
倫敦警指傷勢not serious
而八方同事問完倫敦警方，更有驚人發現。話說《蘋果》駐倫敦特約記者噚日致電倫敦警察廳（Metropolitan Police Service）了解案件，警方就話鄭若驊事發後確實到咗就近醫院求診，但據佢哋了解，傷勢並唔嚴重（not serious）。吓，唔嚴重？唔嚴重又點會有可能要一年先復元？記者梗係再追問具體傷勢，警方都係重申唔嚴重，而目前仲未拘捕任何人。信邊個至好？有網民一語中的：「﹙鄭﹚本來就係一個不誠實的人，英警的答復﹙覆﹚絕對可信。」