反送中運動至今歷時五個幾月，《蘋果》一直企喺抗爭最前線採訪報道，其間多次俾克警暴力恐嚇、指罵係黑記亦從不退縮。礙於新聞工作者身份，記者、編緝絕對不應成為抗爭者嘅手足，但一定義無反顧企喺雞蛋一方，點知呢兩日忽然成為風眼，先係報道抗爭者逃生路線被質疑斷後路，噚日再因為刊登被濫告暴動罪嘅抗爭者名單，又被質疑係變相篤灰。
搞分化 睇低抗爭者智慧
八方更加冇諗過，政治閒人鍵戰廢老689可以用呢樣嘢大做文章，話《蘋果》咁做係為咗暫時叫停暴力抗爭，因為眼中只有選票，仲質問泛民支持者周日會唔會含淚投票。
其實刊登抗爭者被告名單唔係新做法，2016年旺角騷亂有咁處理，今次運動中但凡有大量被告，《蘋果》法庭組同事一樣會製作列表，或者會喺報道入面提佢哋姓名、職業同年齡資料（未成年被告除外），一來涉及公眾知情權，二來因為警方濫捕律政司濫告，唔少家人朋友無從掌握各被告提堂情況，呢個表可能係大家尋人嘅最有效工具，亦方便同路人到場聲援，提供各種協助。
如果刊出一個表就可以叫停暴力抗爭，香港就唔會出現今日局面啦！列寧話過：「敵人讚你嘅時候，你大概係做咗咩事」，八方唔覺得689讚緊《蘋果》，佢只係睇低抗爭一方嘅智慧同意志。必須記住，不割席不分化不篤灰一直係大家公認嘅運動大原則，咁《蘋果》又點會好似689咁與民為敵？
李八方