粵劇名伶任劍輝逝世30周年，91歲嘅白雪仙同一班好友前晚喺君悅酒店舉行晚會，邀請唔少演藝人士出席，當中有任白嘅一對徒弟陳寶珠、梅雪詩，仲有汪明荃（阿姐）、賭王四太梁安琪、呂良偉、唐鶴德（唐唐）、楊受成同姜大衛夫婦等。
上台致辭
阿姐其後喺社交平台貼出晚會內嘅圖片，見到佢嘅招牌「汪阿tag」再度出場，逐張解說有邊位嘉賓出席，其中包括早前深夜返中大呼籲學生和平散去嘅前校長沈祖堯，除去當晚喺中大現身時嘅眼罩豬嘴，回復平時溫文爾雅嘅沈祖堯，見到仙姐好似小粉絲上身，拎起手機同仙姐、阿姐等人自拍留念，而仙姐精神好好，相當精靈，全程由契仔陳培偉醫生陪伴，其間又輕扶仙姐上台致辭。
資深傳媒人汪曼玲都有去晚宴同埋出帖文，當中有佢攬住唐唐嘅合照，又有貼出仙姐喺晚宴後返到屋企，望住任姐嘅相合照，汪曼玲留言：「仙姐在紀念任姐逝世30周年晚宴回家後，仍然在任姐面前，依依不捨的表達她內心深處的無盡思念！」
撰文：馮仁昭